Në konferencën për shtyp ditën e sotme, kryeministri i Kosovës Albin Kurti, është pyetur nëse do të kërkojë leje nga KFOR për të dërguar Forcat e Sigurisë së Kosovës në veri të vendit. Ai tha se vendimi do të merret vetëm kur policia e Kosovës të bëjë vlerësimin e sigurisë dhe shtoi se nuk duhet rënë pre e propagandës së Serbisë.
“Nuk është gjithçka siç e shihni në video e këtyre ditëve, pra jo të gjitha janë lajme të vërteta aq më pak të sakta prandaj të mos biem pre e propagandës së Serbisë. Në anën tjetër, veprimet që ne i ndërmarrim do të jenë në përputhje me vlerësimin e situatës së sigurisë që e bën policia jonë dhe vetëm kur ata e bëjnë vlerësimin e aspektit të sigurisë ne do të mund të themi se çfarë do të bëjmë” – u shpreh Kurti.
Lidhur me reciprocitetin e targave kryeministri Kurti tha se është diçka të cilën Vuçiç nuk po e pëlqen, ndërkohë që mbi 9 mijë automjete kanë marrë targat e përkohëshme duke respektuar vendimin e qeverisë së Kosovës.
“Presidenti i Serbisë nuk po e pëlqen këtë, nga jeta praktike e qytetarëve që dëshirojnë lëvizje të lirë, mbi 9 mijë automjete i kanë marrë targat e përkohëshme, asnjë prej tyre nuk e pati asnjë problem, unë besoj se ky është thelbi. Sigurisht që janë parë fluturaket e tyre edhe helikopterë edhe avionë të prodhimit rus, ne nuk kemi pritur nga Serbia sjellje korrekte sepse i njohim se kush janë në pushtet atje por ne vendimet i marrim në bazë të vlerësimit të sigurisë tash për tash jemi në këtë gjendje sepse të tillë e kemi vlerësuar” – tha ai.
Ditën e sotme në kufi të Kosovës janë parë avionë dhe helikopterë serbë dhe sipas mediave pranë pushtetit në Serbi, disa tanke po dërgohen drejt Jarinjes e Bërnjakut.
