Kryeministri i Republikës së Kosovës, Albin Kurti, raportohet të ketë thënë se normalizimi i marrëdhënieve me Serbinë, duhet të bëhet me njohje reciproke.
Pak ditë pasi i tha “Po” planit europian, i cili nuk përfshin njohje të ndërsjelltë mes dy vendeve, Klan Kosova raporton se Kurti i ka bërë këto deklarata në Forumin Ekonomik në Shkup.
“…mendoj se normalizimi i marrëdhënieve mund të bëhet me njohje të ndërsjellë si pjesë qendrore. Kjo është thënë nga presidenti Biden, sekretari Blinken, kancelari Scholz, që njohja e ndërsjellë, është esenca, pjesa qendrore e normalizimit të plotë të marrëdhënieve për të cilën jemi duke u munduar me shumë zell ta ndërtojmë dhe të vazhdojmë tutje me propozimin e BE-së, i cili iu është prezantuar dy palëve, mua dhe presidentit të Serbisë, dhe kemi pranuar tekstin me këtë propozim dhe kemi miratuar në dy kryeqytetet dhe pastaj në Bruksel.” – ka thënë ai.
Ndërkohë, vetë zëdhënësi i Bashkimit Europian, Peter Stano, ditën e djeshme bëri të ditur se qëllimi i planit europian nuk ka qenë njohja reciproke.
“Qëllimi i dialogut s’është njohja. Është normalizimi i raporteve mes Serbisë dhe Kosovës dhe përmbajtja e normalizimit caktohet nga dy palët. BE-ja është lehtësuese. Ne nuk diktojmë çfarë të bëjnë. Ne po ju ndihmojmë të arrijnë aty në shpirtin europian të kompromisit për të mirën e popujve. Mandati i BE-së është të ndihmojë në arritjen e marrëveshjes finale ligjërisht obliguese për normalizim raportesh.” – tha ai.
nacionale
Discussion about this post