Kryeministri i Kosovës, Albin Kurti e ka quajtur të forta marrëdhëniet e Kosovës me SHBA-në, derisa ka bërë një krahasim sa i përket prioriteteve nën administratën Donald Trump 1 dhe pasuesin e tij Joe Biden. Kurti për një media spanjolle ka folur edhe për njohjen e mundshme të shtetit të Kosovës nga Spanja.
Kryeministri Kurti për gazetën spanjolle “El Mundo”, ka potencuar marrëveshjet ekonomike të arritura ndërmjet Republikës së Kosovës dhe shtetit të Serbisë, për çfarë ka theksuar se kjo ishte qasja e asaj kohe e administratës së presidentit Trump 1 për promovimin e stabilitetit.
Ndërsa, përr administratën Joe Biden, Kurti ka theksuar se ka forcuar institucionet demokratike në Ballkanin Perëndimor.
Sipas Kurtit, Kosova mban një marrëdhënie të fortë bilaterale me SHBA-në, bazuar në përkushtimin e saj të vazhdueshëm për sovranitetin tonë dhe integrimin tonë në Bashkimin Evropian dhe NATO.
Sa i përket njohjes nga Spanja, Kurti ka thënë për “El Mundo” se “nëse Spanja e njeh Kosovën, do të ishte një hap i nënkuptuar drejt stabilitetit brenda Ballkanit”.
“Zgjerimi i Bashkimit Evropian është në tryezën e negociatave në Bruksel dhe kjo do të ishte një përgjigje perfekte për ata që kërkojnë të dobësojnë integritetin dhe bashkimin e Evropës. Republika e Kosovës dhe Spanja nuk kanë asnjë problem bilateral. Prandaj, nuk ka asnjë çështje midis dy vendeve që mund të çojë në një bllokim të njohjes. Besojmë se do të ishte mirë që Spanja t’i bashkohej shumicës së shteteve evropiane që e njohin Kosovën”, tha ai.
Discussion about this post