Teksa ndodhet në Slloveni në kuadër të Samitit të vendeve të BP dhe BE, kryeministri i Kosovës Albin Kurti, ka kritikuar BE-në duke thënë se i ka bërë padrejtësi të madhe Kosovës për mosliberalizimin e vizave.
“Kanë kaluar më shumë se 3 vite që kur KE-ja ka rekomanduar për herë të dytë liberalizimin e vizave. Ka qenë një padrejtësi e madhe dhe mungesë e drejtësisë për qytetarët e Kosovës. Ne kemi shpresë që ky samit, do ta bëjë BE-në të qëndrojë besnike në thelbin e saje ky është zgjerimi i saj, si projekti më i rëndësishëm politik dhe historik i paqes dhe prosperitetit që nga Lufta e Dytë Botërore. BE-ja duhet të vazhdojë me zgjerim që të jetë Evropë. Gjashtë vendet e Ballkanit perëndimor janë ato që i mungojnë Bashkimit Evropian të bëhet Evropë. Ne jemi në Evropë, por Bashkimi Evropian duhet të bëhet Evropë”, ka thënë Kurti.
Më tej kryeministri i Kosovës është shprehur se janë 5 vendet e BE-së që ende nuk e kanë njohur pavarësinë e Kosovës, dhe shpreson që së shpejti ato do ta bëjnë një gjë të tillë.
“Shpresoj që së shpejti ato 5 vende do ti bashkohen vendeve që na kanë njohur. Unë avokoj për mungesën e frikës nga BE-ja dhe hidhërimin nga ana e vendeve të Ballkanit Perëndimor”, tha ai.
Kryeministri shtoi se Kosova nuk ka pranuar asnjë vaksinë nga Rusia dhe Kina, “sepse Bashkimi Evropian është synimi ynë dhe Evropa është kontinenti jonë”.
Ai foli edhe për raportet Kosovë-Serbi, ku tha se duhet të përfundojnë me njohjen e ndërsjellë.
