Kryeministri i Kosovës, Albin Kurti ka reaguar në rrjetet sociale për ndarjen nga jeta të kryesuesit të Bordit të drejtorëve të Agjencisë Kosovare të Privatizimit, Nazmi Mikullovci.
Ai ka thënë se emri i tij mbetet i lidhur përjetësisht me Kosovën, ekonominë dhe industrinë e saj.
Përmes postimit në “Facebook”, Kurti tha se i ndjeri Mikullovci ishte përfaqësues i një gjenerate të jashtëzakonshme profesionistësh që projektuan dhe realizuan në masë të gjerë vetëqëndrueshmërinë ekonomike të vëndit.
“Kushdo e njeh atë si Drejtorin e Trepçës në vitet e shkëlqyera të industrializimit të vendit. Ndërsa shumë nga ne si orientuesin e përpiktë se si të optimalizohen mundësitë vendore në industri dhe ekonomi. Për mua ka qenë më shumë se sa një bashkëpunëtor në më shumë se sa një dekadë”, ka shkruar Kurti.
Tutje, Kurti ka thënë se ka shprehur ngushëllimet e tij për gjithë familjarët dhe shoqërinë e të ndjerit.
“Ngushëllime të sinqerta Familjes Mikullovci, miqve e bashkëpunëtorëve”, përfundon statusi i tij.
Discussion about this post