Kryeministri i Kosovës Albin Kurti ka folur lidhur me personat e humbur gjatë luftës, të cilët nuk janë gjendur ende. Ai ka ndarë një histori personale duke thënë se në vitin 1999 ai ka qenë i zhdukur, teksa familja e tij nuk dinin asgje rreth tij, ndaj ndjente një detyrë morale dhe thirrje të brendshme për të çuar këtë gjë deri në fund. Kurti deklaroi se janë 1600 persona fati i të cilëve nuk dihet ende që nga koha e luftës, ku 2/3 e tyre janë shqiptarë të Kosovës.
“Nga qershorin e vitit 1999, kam qenë i zhdukur, jo për vete por sepse familja nuk e dinte ku jam deri atëherë kur na vizitoi Kryqi i Kuq në korrik të vitit 1999. Prandaj kur u lirova kisha edhe thirrje te brendshme edhe përgjegjësi qytetarë që t’i bashkohem nënës Nysrete dhe shumë nënave tjera, të cilat ishin organizuar që të bëjnë trysni mbi vendorët e ndërkombëtarët, e kjo tenasferohet mbi Beogradin, ashtu që të zbardhen fati i djalit të saj dhe i shumë djemve e vajza të prindërve të Kosovës, të cilët fillimisht ishin 5 mijë, mandej u mor vesh që 2 mijë kanë përfunduar në burgje, ndërkaq rreth 3 mijë ende janë të pagjetur. Ndërkaq tani i kemi mbi 1 600 të pagjetur, nga të cilat janë 2/3 janë shqiptarë të Kosovës”, ka thënë Kurti.
Kurti gjithashtu ka përforcuar qëndrimin e tij mbi marrëveshjen e Kosovës dhe Serbisë, duke theksuar se kjo nuk do të ndodh për aq kohë sa nuk zgjidhet problem i të zhdukurve me dhunë.
“Familjarët kanë kërkuar të ushtrojmë më shumë ndikim të faktorët ndërkombëtar, në mënyrë që të gjendet të zhdukurit. Marrëveshje me Serbinë nuk ka pa u zgjedhur problemi i të zhdukurve me dhunë. Kërkesë tjetër ka qenë hapja e varrezave ne Kishevak, ku këto kanë nisur për t’u gjetur të zhdukurit tanë”, tha Kurti.
Discussion about this post