Kurti për liberalizimin e vizave: Është meritë e të gjithëve

Kryeministri i Kosovës, Albin Kurti uroi sot qytetarët me rastin e miratimit të vendimit për liberalizimin e vizave.

Kurti ka theksuar se kjo është meritë e të gjithëve. Ai falënderoi eurodeputetët, Parlamentin Evropian dhe shtetet e Bashkimit Evropian për votën, vendimin dhe mbështetjen.

“Liberalizimi i vizave ndodhi sot. Nga data 1 janar 2024, qytetarët e Kosovës do të kenë mundësi që të udhëtojnë lirshëm në zonën Shengen. Kjo është meritë e të gjithëve, veçanërisht e qytetarëve tanë. Andaj urime të gjithëve, sepse është për të gjithë”, ka shkruar Kurti në Facebook.

Parlamenti Evropian ka miratuar sot vendimin për liberalizimin e vizave për qytetarët e Kosovës. Miratimi është bërë pa votim, pasi nuk ka pasur asnjë kundërshtim.