Kryeministri në detyrë i Kosovës, Albin Kurti, ka paralajmëruar mundësinë e dy raundeve zgjedhjesh parlamentare përtej balotazhit të paralajmëruar, për shkak të mungesës së numrit të deputetëve për formimin e qeverisë dhe zgjedhjen e presidentit.
Në një konferencë për media, Kurti tha se “edhe në dimër edhe në pranverë” mund të mbahen zgjedhje parlamentare. Ai nënvizoi se aktualisht është e vështirë të arrihen 81 vota të nevojshme për zgjedhjen e presidentit, ndërkohë që kanë mbetur vetëm katër muaj deri në përfundimin e afatit për këtë proces.
“Mbase është për të ardhur keq që përveç balotazhit do të duhet të kemi dy herë zgjedhje. Edhe zgjedhje në dimër edhe zgjedhje në pranverë. Sepse kur nuk arritëm t’i bëjmë 61 deputetë për një qeveri të re, atëherë është e vështirë e imagjinueshme që do t’i bëjmë 81 për presidentin dhe kemi vetëm katër muaj deri te zgjedhja e presidentit,” u shpreh Kurti.
Situata e krijuar thekson sfidat politike në Kosovë, ku mungesa e konsensusit për formimin e institucioneve ka rritur pasigurinë mbi proceset e ardhshme politike dhe zgjedhore.
Discussion about this post