Kurti priti ambasadorin hungarez në takimin e lamtumirës

Kryeministri i Republikës së Kosovës, Albin Kurti, priti në një takim lamtumirës Ambasadorin e Hungarisë në Prishtinë, József Bencze.

Përmes një njoftimi për media, thuhet se në këtë takim të fundit gjatë mandatit të tij, Kryeministri Kurti e falënderoi ambasadorin Bencze për bashkëpunimin e deritanishëm dhe vlerësoi angazhimin e tij për thellimin dhe zgjerimin e marrëdhënieve bilaterale ndërmjet Kosovës dhe Hungarisë.

Po ashtu Kurti e ka vlerësuar lartë bashkëpunimin për projektet e përbashkëta në fusha të ndryshme, veçanërisht në edukim, ku dhjetëra studentë nga Kosova po studiojnë në Hungari dhe në kulturë ku përmes marrëveshjeve të ndryshme po zgjerojmë bashkëpunimin.

Duke shprehur mirënjohje për kontributin e tij për Republikën e Kosovës, Kryeministri Kurti i uroi ambasadorit Bencze suksese në angazhimet e tij të radhës./RTK