Kurti rendit sukseset gjatë qeverisjes dy-vjeçare në Kosovë

Në mbledhjen e qeverisë, kryeministri i Kosovës, Albin Kurti ka theksuar punën dy-vjeçare të qeverisjes së tij në shumë sektorë.

Sipas tij Kosova nën udhëheqjen e tij ka pasur ‘ringjallje’ dhe rikthim.

“Sonte bëhen dy vjet nga dita e parë e shërbimit tonë. Shpresa për më mirë dhe besimi që ajo mund të arrihet janë edhe shkaku edhe arsyeja se pse ne jemi këtu, të zgjedhur të popullit për ta bërë ndryshimin, me një kabinet të përzgjedhur për ta realizuar potencialin.

Sot pandemia mund të na duket edhe një kujtim i largët, nganjëherë surreale, por është dhimbja për humbjen e më të dashurve tanë, familjarëve e miqve që na e rikujton më së miri rrezikun që e kemi jetuar vetëm dy vjet më parë”, ka thënë Kurti në fillim të fjalimit.

Ai tha se rritja mesatare ekonomike në këto dy vite ka qenë 7 për qind.

“Për dy vite buxhetit të shtetit i janë shtuar mbi 700 milionë euro, këto pa ndryshim të politikave fiskale. Por, vetëm si rezultat i qeverisjes së mirë”, është shprehur ai.

Kurti shtoi se institucionet e sigurisë kanë bërë punë të mirë në luftimin e dukurive kriminale.

Sipas tij për dy vjet kanë shkatërruar 14 laboratorë droge, tetë prej të cilëve në veri, teksa tha se kanë mbyllur 16 rrugë ilegale që përdoreshin për kontrabandë në veri.

“Shkatërruam 14 laboratorë të drogës prej të cilëve tetë në veri, mbyllëm 16 rrugë ilegale në veri të vendit që përdoreshin për kontrabandë nga grupe kriminale, u sekuestruan rreth 2 tonë substancë narkotike, u sekuestruan mbi 100 vila të ndërtuara ilegalisht në parkun nacional në Brezovicë”, tha Kurti.

Kryeministri ka përmendur edhe sfidat, pandeminë COVID-19, krizën energjetike dhe luftën në Ukrainë.