Kryeministri Albin Kurti u tregon amerikanëve se si është për Kosovën të jetojë pranë një fqinji agresiv siç është Serbia. Në një intervistë në CNN, shefi i qeverisë e barazon Serbinë me Rusinë, duke përmendur kërcënimin e vazhdueshëm që përbëjnë 48 bazat ushtarake që rrethojnë kufirin me Kosovën. Kurti tha se po u kërkon aleatëve perëndimorë që t’i bëjnë presion Beogradit për çaktivizimin e këtyre bazave që kanë nga 50 deri në 150 ushtarë të pajisur me armë dhe mjete luftuese ruse dhe kineze.
“Serbia është shumë e ngjashme me Federatën e Rusisë. Ata nuk i njohin defakto apo dejure fqinjët e tyre. U shkaktojnë probleme fqinjëve pasi kërkojnë zgjerim të territorit. Në anën tjetër, duhet ta them se ndoshta Rusia imiton Serbinë gjatë regjimit të Millosheviçit. Po shohim se si presidenti despotik Putin dëshiron ta kthejë Ukrainën në një skenar të ngjashëm me Bosnjen, me një territor totalisht të ndarë, për ta bërë shtet jofunksional duke krijuar mundësi për të pushtuar territor. Rusia dhe Serbia, historikisht, kulturalisht dhe politikisht kanë imituar njëra-tjetrën. Prandaj ne jemi shumë të shqetësuar pasi është në interesin e Kremlinit për të hapur konflikte të reja në Europë përmes mashës së saj. Serbia në Ballkan është një vegël e Rusisë”, tha Albin Kurti.
Në të njëjtën intervistë me të ishte dhe gjenerali historik i NATO-s, Wesley Clark, i cili gjithashtu e përkufizoi Serbinë një kërcënim për paqen në rajon.
“Dora e Rusisë ndihet në Ballkan. Serbia është krahu i Rusisë në Ballkan. Serbia u shërben interesave të Rusisë. Presidenti Vuçiç është i mençur. Ai tenton të duket se po luan me dy porta, por kur të vijë momenti, ai do të bëjë çfarë i kërkon Putini. Dhe çfarë ai do nga Putini, sigurisht është autoriteti për të përdorur trupat e tij në Kosovë, të paktën të marrë gjysmën e pjesës veriore të Kosovës dhe ndoshta më shumë. Njëkohësisht, duan ta ndajnë Bosnjën, ta marrin Republikën Sërpska dhe ta bëjnë ‘Serbinë e Madhe’. E gjithë kjo ka të bëjë me spastrim etnik në Ballkan”, deklaroi Wesley Clark.
Gjenerali Clark shton se ka patur mjaft dhunë dhe konflikte në Ballkan, prandaj në 30 vitet e fundit NATO ka ndërhyrë për të ndaluar përdhunimet, vrasjet, spastrimet etnike dhe gjenocidet. Ai kërkoi nga aleanca e fuqishme që të bëjë më shumë për ta ndihmuar Ukrainën që të jetë një histori suksesi, siç është aktualisht Kosova.
Discussion about this post