Kurti takim në Senat dhe Shtëpinë e Bardhë, zyrtari i lartë: Jemi pro dialogut Kosovë-Serbi

Shtëpia e Bardhë njoftoi sot për takimin e Këshilltarit për Siguri Kombëtare të SHBA-së, Jake Sullivan me kryeministrin e Kosovës, Albin Kurti.

Në njoftim thuhet se Sullivan falënderoi kryeministrin për gatishmërinë e Kosovës për të pritur të evakuuarit afganë.

“Ata shkëmbyen mendime mbi agresionin ushtarak të Rusisë kundër Ukrainës, duke përfshirë ofrimin e ndihmës humanitare nga Kosova për popullin e Ukrainës dhe vendosjen e sanksioneve kundër Rusisë”, thuhet në njoftim.

Po ashtu referuar njoftimin të Shtëpisë së Bardhë, Sullivan dhe Kurti diskutuan gjithashtu për stabilitetin në Ballkanin Perëndimor.

Në njoftim më tej bëhet e ditur se Sullivan shprehu mbështetjen e SHBA-së për dialogun e lehtësuar nga BE-ja për të arritur një marrëveshje gjithëpërfshirëse ndërmjet Kosovës dhe Serbisë dhe nevojën për përparim të mëtejshëm në çështjet kyçe të pazgjidhura.

Sullivan po ashtu mirëpriti planet e Kosovës për të kaluar nga varësia nga thëngjilli për prodhimin e energjisë elektrike dhe për të siguruar furnizim të qëndrueshëm.

Edhe Zyra për media e Kryeministrisë ka njoftuar për takimin Kurti-Sullivan.

Kryeministri Kurti tha se Republika e Kosovës është e përgatitur për të thelluar partneritetin e bazuar mbi vlerat e përbashkëta me ShBA-në dhe është e përkushtuar në rrugën e saj të integrimit në Bashkimin Evropian dhe në përfshirjen sa më të shpejtë në Programin e Partneritetit për Paqe, si hap i parë drejt anëtarësimit në NATO.

Gjatë takimit u diskutua për invazionin dhe agresionin në Ukrainë dhe përpjekjet destabilizuese të Rusisë dhe të zgjatimeve të saj në rajon.

U bisedua për rreshtimin e Republikës së Kosovës me ShBA-në dhe botën demokratike në dënimin e invazionit dhe agresionit ushtarak rus në Ukrainë dhe vendosjen e sanksioneve ndaj Federatës Ruse.

Kryeministri i Kosovës, Albin Kurti, është pritur në takim edhe nga Senatorja Joni Ernst.

Duke shprehur mirënjohje për mbështetjen e vazhdueshme në të gjitha fushat nga Shtetet e Bashkuara të Amerikës, Kurti ka falënderuar senatoren Ernst, veçanërisht për përkrahjen e Gardës Kombëtare të Iowas për ngritjen e kapaciteteve dhe zhvillimin e Forcës së Sigurisë së Kosovës, thuhet në njoftimin e Qeverisë së Kosovës.

Kryeministri ka theksuar se mbështetja e tillë invazionit ilegal të Rusisë dhe aleancës ushtarake midis Serbisë dhe Rusisë.

“Në takim u bisedua për zgjerimin dhe thellimin e partneritetit strategjik ndërmjet Republikës së Kosovës dhe Shteteve të Bashkuara të Amerikës, veçanërisht bashkëpunimin në fushën e mbrojtjes dhe fushat zhvillimore”, thuhet në komunikatën për media.