Kryeministri i Kosovës, Albin Kurti ka zhvilluar një takim ditën e sotme me ambasadorin e ri të SHBA-së në Kosovë, Jeffrey Hovenier. Takimi është pasuar me një komunikim për mediat, ku Kurti është shprehur se ambasadori i ri i SHBA-së e njeh mirë rajonin dhe Kosovën, ndaj kjo pritet të shërbejë në favor të forcimit të bashkëpunimit mes dy vendeve, për të zgjeruar aleancën në shumë fusha.
“Ambasadori i ri e njeh shumë mirë rajonin tonë, Kosovën, popullin dhe historinë tonë. Andaj në javët, muajt dhe vitet në vijim pres të kemi bashkëpunim të ngushtë për marrëdhënien sa më të mira ndërmjet Kosovë dhe SHBA-ve në mënyrë që të zgjerojmë dhe të thellojmë aleancën tonë e cila është në shumë fusha prej demokracisë, sundimin të ligjit, qeverisjes së mirë, investime ekonomi dhe deri tek mbrojtja dhe siguria, paqes dhe stabilitetit afatgjatë”, tha ai.
Ambasadori i SHBA-së në Kosovë, Jeffrey Hovenier, theksoi se dy vendet do të çojnë më tej bashkëpunimin e tyre, duke vazhduar rrugën drejt prosperitetit dhe krijimit të një shteti demokratik.
“SHBA çmon marrëdhënien që ka me Kosovën dhe unë e çmoj këtë marrëdhënie. Besoj se me do të vazhdojmë bashkëpunimin e ngushtë me kryeministrin dhe qeverinë e tij për të vazhduar drejt rrugëtimit për një shtet i cili është demokratik, shumetnik dhe me prosepritet”, tha ai.
Mëngjesin e sotëm, ambasadori Hovenier dorëzoi letrat kredenciale tek presidentja e vendit, Vjosa Osmani.
Discussion about this post