Kryeministri i Kosovës Albin Kurti, në 111-vjetorin e Pavarësisë së Shqipërisë, nga Vlora, ka uruar shqiptarët për festën e madhe të flamurit.
“Ishte kënaqësi që të ndjekim ekspozitën e kuruar me shumë kujdes dhe pasion nga Evi Pojani me piktorë vlonjat pastaj të shohim edhe përmbledhjen filatelike, ndërsa në hyrje janë edhe dokumente historike të komunitetit Mbrojtja Kombëtare e Kosovës. Nga maji i vitit 1918 deri në janarin e vitit 1923. Me këtë rast, gëzuar të gjithë shqiptarëve 28 nëntorit, këtë festë të madhe të flamurit, lirisë, pavarësisë dhe bashkimit të të gjithë shqiptarëve në Shqipëri, kudo në Ballkan, rajon, e mërgatë. Lavdi dëshmorëve të Kombit. Sot është ditë pushimi, por çdo ditë tjetër duhet të punojmë për idealet e Ismail Qemalit nga Vlora, Skënderbeut nga Kruja e Adem Jasharit nga Prekazi”, tha Kurti.
Pyetjeve në lidhje me deklaratat e ish-kryeministrit Sali Berisha për takimin sot me kreun e qeverisë shqiptare Edi Rama, Kurti tha: “Nuk është sot dita të flasim për dallime politike, por polemikat aktuale. Sot jemi bashkë, shqiptarët kanë të përbashkët gjuhën dhe kulturën, historinë dhe ardhmërinë dhe e tashmja mbushet me kuptim pikërisht në këtë moment. Kemi shumë ditë të tjera përgjatë vitit për këto tema.”
Discussion about this post