Komisioni i Ligjeve pritet të miratojë të hënën, më 13 tetor në orën 17:00, vakancën për postin e Avokatit të Popullit, duke i hapur zyrtarisht rrugën procedurave për zgjedhjen e pasardhësit të Erinda Ballancës, e cila vijon të mbajë detyrën prej më shumë se tre vitesh pas përfundimit të mandatit kushtetues.
Zgjedhja e Avokatit të Popullit kërkon një shumicë të cilësuar prej 84 votash në Kuvend, një objektiv i vështirë pa konsensus politik, por me 83 vota të siguruara dhe mbështetjen e mundshme të PSD-së, Partia Socialiste është praktikisht në pozicionin për ta kaluar votimin edhe pa dakordësinë e opozitës.
Erinda Ballanca u zgjodh në këtë post më 22 maj 2017, pas marrëveshjes politike Rama–Basha, me një mandat 5-vjeçar që përfundoi në mars të vitit 2022. Sipas ligjit, ajo ka vijuar të ushtrojë detyrën deri në zgjedhjen e pasuesit, megjithëse përtej afateve kushtetuese, situatë që ka ngritur shqetësime për zvarritjen e qëllimshme të procesit.
Gjatë legjislaturës së kaluar, ka pasur disa tentativa për një emër konsensual, të cilat kanë dështuar. Partia Demokratike propozoi më herët Besim Ndregjonin, por kandidatura nuk mori mbështetje të mjaftueshme në Kuvend.
Me mungesën e dialogut politik dhe përçarjet e brendshme në opozitë, këtë herë mazhoranca pritet të marrë vetë në dorë zgjedhjen, duke e çuar procesin drejt një vendimmarrjeje të njëanshme. Avokati i Popullit është një nga institucionet kyçe të mbrojtjes së të drejtave të njeriut në Shqipëri. Emërimi i tij kërkon jo vetëm legjitimitet ligjor, por edhe moral dhe politik, për të garantuar pavarësinë e institucionit. Seanca plenare për miratimin e kandidaturës pritet të mbahet menjëherë pas miratimit të vakancës nga Komisioni i Ligjeve. Emrat potencialë ende nuk janë bërë publikë.
Discussion about this post