Trajneri i kombëtares shqiptare, Sylvinho, publikoi sot listën e lojtarëve të thirrur për dy ndeshjet e fundit në grup për kualifikueset Euro2024 që do të zhvillohet në Gjermani. Shqipëria udhëheq grupin me 13 pikë, ndërsa do të përballet me Moldavinë në transfertë dhe më pas me Ishujt faroe në “Air Albania”.
Mes emrave të grumbulluar për këto dy takime është edhe ai i Arbnor Muçollit. Sulmuesi është risia më e fundit në kombëtaren kuqezi.
Muçolli është një futbollist me orgjinë shqiptare që aktivizohet me klubin suedez të IFK Goteborg.
24-vjeçari ka lindur në Frederica të Danimarkës më 15 shtator të vitit 1999. Prindërit e tij janë me orgjinë nga Podujeva e Kosovës.
Ai e filloi karrierën e tij në futboll me klubin lokal Fredericia në moshën 5-vjeçare.
Në verën e vitit 2012, Muçolli u transferua në akademinë e Vejle BK. Ai bëri debutimin e tij për ekipin e parë të Vejle më 17 nëntor 2016, në moshën 17-vjeçare. Në klubin danez ai qëndroi deri në verën e këtij viti, para se të bashkohej me suedezët e Goteborg-ut.
Përsa i përketë karrierës ndërkombëtare, Muçolli e nisi atë te Danimarka U-18. Ai luajti katër herë në nivelin U-18 për Danimarkën, duke bërë debutimin e tij ndërkombëtar më 8 mars 2017 kundër Italisë si zëvendësues në minutën e 68-të.
Por, pasi mori pasaportën shqiptare më 8 shkurt 2018 ai vendosi të përfaqësonte ngjyrat kuqezi.
Muçolli u thirr nga Shqipëria U-21 për herë të parë për kualifikueset e UEFA Euro U-21 2019 në shtator 2018. Ai bëri debutimin e tij kundër Spanjës më 6 shtator.
Arbnori nuk është i panjohur edhe për ekipin A të Shqipërisë. Ai deri më tani ka arritur të paraqitet në tre ndeshje miqësore me kuqezinjtë.
24-vjeçari bëri debutimin e tij të parë për Shqipërinë në një miqësore kundër Estonisë më 13 qershor 2022.
Pas asaj ai ka luajtur në miqësoret ndaj Arabisë Saudite dhe Armenisë.
Discussion about this post