Eksperti i kriminalistikës Ervin Karamuço tha mbrëmjen e sotme në emisionin Zonë e Lirë se në Tiranë shtë shmangur një ngjarje mjaft e rëndë që mund të krijonte një përplasje të fortë mes Shqipërisë dhe Rusisë.
Karamuço tha se autoritetet shqiptare, bazuar në informacione të partnerëve, kanë arrestuar një shtetas rus, të kërkuar nga autoritetet ruse.
“Rusi është arrestuar në vigjilje të asaj që ndodhi në Veri të Kosovës. Rusi i arrestuar është krahu i djathtë i një prej mafiozëve më të madh rusë. U arrestua në kufirin me Malin e Zi, u transportua në një burg në veri të Shqipërisë, më pas u soll me urgjencë në Tiranë, pasi kishte frikë se mund të vritej në burg, mund të sulmohej burgu nga grupe kriminale me qëllim që ose ta nxirrnin nga burgu ose ta vrisnin”, tha Karamuço.
Ai u shpreh se nëse nuk do të arrestohej ky person do të kishim një përplasje me autoritetet ruse.
Karamuço theksoi se personi i arrestuar është një personazh që rrezikon po të flasi një nga familjet mafioze më të rëndësishme ruse.
Çfare tha Karamuço?
“Ka ndodhur një gjë që shumë pak veta e dinë. Shqipëria ka shmangur, këto ditë, një ngjarje shumë të rëndë kriminale, që mund të kishte pasoja në marrëdhëniet me Federatën Ruse. Kjo ka ndodhur në vigjilje, përpara se të ndodhte ngjarja e Mitrovicës, ka qenë një informacion që na ka ardhur dhe nga partnerët. Një rus, u ndalua nga ne, i cili ishte në kërkim nga Interpol Moska. U ndalua në kufi, është çuar në një burg në veri të Shqipërisë.
Më pas ka ardhur një informacion urgjent, kishte dy mundësi, ose do ta vrisnin në burgjet tona dhe do mbante llogari shteti shqiptar, ose mund të kishte një organizim përmes organizatave të rrjetit ballkanik kriminal, një përpjekje për ta nxjerrë nga burgu, duke sulmuar. Këto ishin dy alternativat që erdhën si informacion. E kanë sjellur urgjent, brenda ditës, për 2 orë, nga burgu që është në veri të Shqipërisë, e kanë sjellë në mes të Tiranës dhe e ruajnë derisa ai të ekstradohet në drejtim të Rusisë. Është akoma këtu. Ky është një sukses shumë i madh i SHKB të burgjeve, Ministrisë së Drejtësisë, Drejtorisë së Burgjeve dhe Policisë së Shtetit.
Kanë qenë bashkë të lidhura, edhe për të marrë informacionin në kohë reale dhe për të evituar këtë lloj përplasjeje që mund të ndodhë. Ky është krahu i djathtë i një prej eksponenëve më të mëdhenj të mafies ruse dhe ata kanë pasur dy probleme, ose donin ta vrisinin që ky të mos fliste, sepse duke ardhur në Moskë, mund të bëhej bashkëpunëtor i drejtësisë e të fliste për shumë personazhe të tjerë, ose për ta shpëtuar, për të mos e kthyer në Moskë, që të mos jepte informacion. Rrezikonte një familje mafioze. Shteti rus po kërkon për ta kthyer. Është duke u gjykuar për ta dhënë”, theksoi ai.
Discussion about this post