Ka qenë një mosmarrëveshje mes familjeve me origjinë shqiptare shkaku i përfundimit të një përleshjeje të dhunshme në tragjedi, mbrëmjen e së mërkurës në Tavullia (7 Gusht), në provincën e Pesaro Urbinos.
Gjatë një debati të fortë, Dritan Idrizi, 38 vjeç, u godit me thikë për vdekje tre herë në gjoks, teksa një nga plagët për fat të keq ishte në pjesën e zemrës. Pavarësisht përpjekjeve të dëshpëruara për ta shpëtuar në spitalin Cattolica, i riu, baba i një vajze të mitur, humbi jetën për shkak të tre goditjeve fatale.
Media italiane “ADN24”, përleshja shpërtheu përgjatë rrugës që lidh Tavullia me San Giovanni në Marignano, ku Idrizi, që më herët ka mbajtur edhe mbiemër tjetër (Dritan Xhepexhiu), i shoqëruar nga shokë të armatosur me shkopinj dhe hekura, kishte shkuar për të zgjidhur një mosmarrëveshje financiare prej 5000 eurosh, lidhur për punët e ndërtimit. Por situata degjeneroi shpejt, duke i lënë vendin goditjeve, grushteve, përdorimit të armëve të ftohta dhe mjeteve të forta, si me çekiç e shkopinj.
Autori ka përfituar nga një moment, duke kapur një thikë dhe sulmuar viktimën.
“Përveç Idrizit, gjatë përleshjes raportohet se kanë mbetur të plagosur edhe tre persona të tjerë, me prognozë deri në 40 ditë”, raportuan mediat e vendit fqinj.
Fillimisht, sipas dinamikës së krimit referuar hetimeve paraprake, ka qenë një nga anëtarët e grupit të të ndjerit që ka sulmuar një grua të familjes ku po kërkohej borxhi. Dyshohet se ajo është goditur me çekiç në kokë. Më pas një person i armatosur me thikë ka goditur Idrizin tre herë në gjoks.
Për momentin nuk ka asnjë të arrestuar, por karabinierët e Pesaros po hetojnë me akuzat për vrasje, tentativë vrasje dhe plagosje të rëndë dhe autori është identifikuar, por emri i tij nuk u bë publik. Po këto media raportuan edhe se viktima më herët ka pasur precedent penalë, i hetuar për çështje në fushën e narkotikëve, por aktualisht ishte person i lirë dhe jo në kërkim.
Referuar një komunikate zyrtare të Policisë së Shtetit në fillim të vitit të kaluar, kur u ndalua në Tiranë paraprakisht për llogari të Italisë, sepse kishte thyer masën e arrestit të dhënë nga drejtësia e vendit fqinj dhe s’duhej të largohej nga territori: “Dritan Idrizi, alias Dritan Xhepexhiu, u arrestua së bashku me Elion Bejon për trafik droge.
Idrizi së bashku me Bejon gjatë periudhës 07.10.2019-26.10.2019, në bashkëpunim me shtetas të tjerë, ka shitur lëndë narkotike heroinë dhe kokainë, në doza, me vlerë rreth 17 mijë euro”. Por pas disa ditësh qëndrimi në paraburgim ai u lirua dhe hetimet u zhvilluan në gjendje të lirë. Idrizi më tej u rikthye në Itali, ku vijonte ndjekjen e procedurave për çështjen e hapur dhe u la po në gjendje të lirë.
Discussion about this post