Kush i dekonspiron operacionet e SPAK?

Dënimi i Arben Ahmetajt, ish-kryeprokurorit Adriatik Llalla dhe arrestimi i Alqi Bllakos, Safet Gjicit, ish-ministrit të Mjedisit Lefter Koka janë disa nga goditjet më të bujshme të kësaj prokurorie, por ish-kreu i akuzës u arratis ndërsa bosët e inceneratorëve po ashtu u larguan. Pak ditë para se të merrej vendimi për dënimin e tij me 2 vite burg, Adriatik Llalla u arratis. Vetë SPAK nuk kërkoi masë arresti ndaj tij ose bllokim të pasaportës dhe kjo solli arratisjen e Llallës drejt Italisë. Rasti më flagrant është ai i operacionit të disa ditëve më parë ku Arben Ahmetaj u arratis.

Gjithashtu, dy emra të tjerë të akuzuar si të përfshirë në këtë ngjarje janë Klodian Zoto e Stela Gugallja, administratorët e inceneratorëve. Mësohet se ata janë informuar më herët për operacionin e SPAK dhe policisë, e për këtë arsye kanë mundur të largohen duke i shpëtuar arrestimit. Disa raste kemi pasur me operacionet sa i takon kapjes së kokainës në Portin e Durrësit. Ka pasur shumë kokainë të kapur, por asnjëherë nuk kanë shkuar në pranga porositësit e drogës. Të vetmit që e kanë pësuar janë shoferët e kamionëve. Ndërkohë në korridoret e drejtësisë flitej për arrestime gjyqtarësh të kapur në afera, por disa herë këto operacione janë dekonspiruar dhe ata nuk janë arritur të prangosen. Pra duket se diçka rrjedh nga SPAK, por ndoshta dhe nga policia apo grupet hetimore. Personat e rëndësishëm po arratisen dhe skandali më i madh është ai inceneratorëve, pasi dy bosët në arrati kanë në dorë fatin e shumë emrave. Ata kanë dijeni për çdo gjë dhe nëse ata flasin, mund të kemi shumë ish-ministra të tjerë në pranga. Pra gjithë këto lëvizje nga SPAK, si trupa e veçantë speciale që do të ekzekutojë urdhër-arrestet për peshqit e mëdhenj, projekti për të ndërhyrë direkt në databazën e AKSH për të mos dalë informacionet sensitive pritet të sjellin ndryshime të mëdha dhe goditje të bujshme që asnjë prej pushtetarëve të lartë të korruptuar nuk do t’i shpëtojnë dot pasi nga pas kjo strukturë ka dhe amerikanët, të cilët mbajnë dhe shkëmbejnë informacione të rëndësishme herë pas here.