Doloreza Musabelli, Prokurore e SPAK, prej ditës së djeshme është nën mbrojtjen e strukturave të specializuara të sigurisë, pas dëshmisë së dhënë nga i penduari Marjus Tafani, që zbuloi se prokurorja ishte objektiv i grupit të Laert Haxhiajt.
Sipas gazetares Klodiana Lala, arsyeja pse shteti u “ngrit në këmbë”, ishin deklaratat e Marjus Tafani, se dikush afër prokurores po i jepte informacion grupit kriminal mbi jetën e saj.
Gazetarja deklaron se grupi i Haxhiajt kishte marrë informacion mbi vendbanimin e prokurores, madje ajo ishte ndjekur dhe ishte fotografuar në marketet ku kryente pazar, apo ku nxirrte fëmijët për argëtim.
“Çfarë tha i penduari Marjus Tafani që e ngriti kaq shumë në këmbë institucionet shqiptare. Ai tha se dikush pranë prokurores Doloreza Musabelliu po jepte informacion. Të dhënat ishin të natyrës se në çfarë shkolle i dërgonte fëmijët, ku ajo banonte, ku e kishte zonën bashkëshorti i saj avokat, cilat vende frekuentonte, ku nxirrte fëmijët për të pushuar apo lëvizur me biçikletë, cilat markete frekuentonte.
Madje ka patur foto ku prokurorja Musabelliu është fotografuar duke bërë pazar në market.
Ju pyesni që a mund të hetojnë prokurorët kur janë nën presion. A e dini kur nisi revanshi ndaj krimit të organizuar në Itali, kur u vra Falcone dhe Borselino. Uroj të mos të ndodhë asgjë ndaj zyrtarëve të drejtësisë, por pika e vlimit është tani. Është momenti kur prokuroria e Posaçme po bën goditje ndaj peshqve të mëdhenj të politikës”, tha Lala.
I penduari i drejtësisë, Marjus (Artan) Tafani, pjesë e bandës së Laert Haxhiut, ka rrëfyer planet e grupit për eliminimin e 2 prokurorëve dhe një avokati.
Discussion about this post