Në mbledhjen e sotme të Komisionit për Punën, Çështjet Sociale dhe Shëndetësinë ishte parashikuar një dëgjesë me ministren e Shëndetësisë, Ogerta Manastirliu dhe ministren e Arsimit, Evis Kushi për masat e marra për fillimin e vitit shkollor dhe akademik për përballimin e pandemisë.
Që në nisje të mbledhjes, drejtuesja e Komisionit, njëkohësisht deputetja e PD, Albana Vokshi tha se në mbledhje ishte vetëm ministrja e Shëndetësisë, ndërkohë që ajo e Arsimit nuk kishte shkuar, me pretendimin se kishte një axhendë tjetër.
Vokshi tha se pyetjet për Kushin duhet që të bëhen vetëm në momentin kur vetë ministrja do të jetë e pranishme në mbledhje.
“Ministrja e Arsimit nuk merr pjesë në dëgjesë, është hera e tretë që nuk paraqitet në Komision. Axhendën e Komisionit nuk e bën ministrja, duhet të ishte në mbledhje. Sado që të fshihet është e detyruar që një ditë të vijë këtu dhe të na përgjigjet për masat që janë marrë dhe për masat që nuk janë marrë”, u shpreh Vokshi.
Ndërsa deputeti Socialist Ilirjan Pendavinji tha se ministrja është zëvendësuar nga zëvendësi, por kjo u cilësua si e papranueshme nga deputetët e PD.
“Pse po bën zhurmuesin, më le të flas. S’po të ndërhyj, të themi gjërat që janë të vërteta. Ti thuash zv. ministrit që s’je kompetent dhe i aftë për t’iu përgjigjur pyetjeve dhe t’i thoni del jashtë, kjo nuk duhet të funksionojë. E mira është të gjejmë një gjuhë të përbashkët dhe ta thërrasim ministren në një herë tjetër. Këtë seancë ta kalojmë”, tha Pendavinji.
Ndërkohë që deputetja e PS, Klodiana Spahiu tha se ministrja Kushi i ka dhënë këto përgjigje njëherë tjetër në komisionin e Edukimit, dhe sa kohë që zv.ministrja është e pranishme, mbledhja duhet të vijojë.
