Situata në burgjet e vendit është tema e diskutuar në Komisionin për Sigurinë Kombëtare ku janë ngritur një sërë problematikash.
Kushtet e vështira në burgje, mbipopullimi, kujdesi shëndetësor, por edhe ngjarjet kriminale të cilat janë orkestruar nga brenda janë disa nga çështjet e shtruara nga deputeti demokrat Ferdinand Xhaferaj. I pranishëm për të dhënë përgjigje ishte Drejtori i Përgjithshëm i Burgjeve, Agim Ismaili.
“Nisur nga prezantimi juaj, ju e ndatë në blloqe problemin, që janë kushtet e të burgosurve dhe mbipopullimi. Shqetësuese gjithashtu është se një pjesë e ngjarjeve kriminale orkestrohen nga brenda burgjeve dhe kjo ka të bëjë me një problematikë të nivelit të sigurisë. Kushtet e të burgosurve dhe nivel i sigurisë, janë 2 problematika”, tha demokrati.
Sipas drejtorit, problemi i mbipopullimit në burgje tashmë është zgjidhur. Ende e pazgjidhur është situata për një institut në Krujë ku trajtohen shtetasit me masë mjekësore. Ai e quan gangrenë, ku pohon se aty ka mbipopullim, por këtë gjë duhet ta zgjidhë Ministria e Shëndetësisë.
“Problemi i mbipopullimit në burgje është i zgjidhur në masën 100%. Ka vetëm 1 problem për shtetasit me masë mjekësore që i trajtojmë ne ende, ka një institut të posaçëm që është në Krujë që do mbyllet shpejt, aty ka mbipopullim, por ata s’mund të trajtohen dikur tjetër veçse aty, kemi marrë masa për ta zgjidhur”, u shpreh Ismaili.
Ngjarjet kriminale të cilat janë orkestruar nga brenda burgut janë pranuar nga drejtori, por sipas tij ato kanë ndodhur më parë pasi tani janë marrë masa.
“Po është e vërtetë që ka pasur probleme serioze në lidhje me këtë gjë, organizatat kriminale në burg kanë vazhduar thjesht kanë pasur rezidencë, kanë qenë në hapësirë gjeografike të kufizuar dhe liri mendimi dhe veprimi. Por ky realitet i përket të kaluarës sepse si kanë më ato komoditete, as kushte”, përfundoi ai.
Discussion about this post