Zgjedhjet për Bashkinë e Tiranës mund të zhvillohen vetëm pas vendimit që do të marrë Gjykata Kushtetuese më 31 tetor mbi ankimimin e Erion Veliajt ndaj shkarkimit të tij nga Këshilli Bashkiak dhe Këshilli i Ministrave. Në të kundërt, procesi zgjedhor mund të shtyhet deri në përfundim të mandatit aktual, në vitin 2027.
Kështu u shpreh sot ish-kreu i Komisionit Qendror të Zgjedhjeve, Kristaq Kume, gjatë një interviste në emisionin “News 24”, duke analizuar situatën pas pezullimit të dekretit të Presidentit Bajram Begaj për zgjedhjet e pjesshme në Tiranë, të parashikuara më 9 nëntor.
“Më 31 tetor do të nisë shqyrtimi gjyqësor i padisë së Veliajt lidhur me shkarkimin e tij. Në varësi të vendimit që do të marrë Gjykata, janë të mundshëm dy skenarë: zhvillimi i zgjedhjeve të reja pas vendimit të Kushtetueses ose mosmbajtja e zgjedhjeve, duke e lënë gjendjen aktuale të pazgjidhur deri në zgjedhjet e radhës në vitin 2027,” tha Kume.
Sipas tij, vendimi i Gjykatës Kushtetuese për të pezulluar dekretin e Presidentit ishte një veprim parandalues, për të shmangur pasoja të pariparueshme në rast se Veliaj do të fitonte ankimimin dhe zgjedhjet do të ishin zhvilluar ndërkohë.
“Gjykata Kushtetuese mori një vendim të përkohshëm për të mos lejuar zhvillimin e zgjedhjeve, duke pritur përfundimin e shqyrtimit të padisë së Veliajt. Presidenti nga ana tjetër ka anashkaluar Nenin 115 të Kushtetutës dhe është mbështetur vetëm në aktet e Këshillit të Ministrave dhe shpalljen e vakancës,” shtoi Kume.
Kjo situatë krijon një precedent të pazakontë kushtetues dhe administrativ, ku vakanca në një bashki kryesore si Tirana mbetet e pazgjidhur për një periudhë të pacaktuar, derisa të ketë një vendim përfundimtar nga Gjykata Kushtetuese.
Discussion about this post