Nisja e seancës plenare u shoqërua sot me replika mes kreut të grupit parlamentare të Partisë Demokratike, Gazment Bardhi dhe kryetares së Kuvendit, Elisa Spiropali.
Bardhi tha se parlamenti po trajtohet nga Spiropali si pronë private.
Sipas tij seanca duhet të mblidhej të enjten.
“Do duhej që parlamenti mblidhej të enjten dhe na thate që jeni vizitë zyrtare në Ukrainë. Në fakt ishit duke ngrenë drekë në Greqi. Kjo është një arrogance e shtuar dhe tregues se si po e trajtoni Kuvendin si prone private. Gjithashtu ju bej me dije se po mbani me sirtarët e Kuvendit me shume se 60 nisma ligjore të ardhura nga deputët. Ju trajtoni me urgjenca ligjet korruptive të qeverisë dhe lini në harresë nismat e deputeteve dhe kryesisht të deputetëve opozitar”, u shpreh Bardhi.
Në përgjigjen e saj ndaj Bardhit, kryeparlamentarja Spiropali theksoi “seanca nga data 12 në datën 16 qershor nuk u shty për arsye të pjesëmarrjes sime në Samitin “Evropë Juglindore-Ukrainë”, por u shty se shumë deputetë të tjerë kishin mungesa nga aktivitete të tjera”.
Spiropali nënvizoi se “ishte lehtësisht e zëvendësueshme prezenca ime këtu me dy nënkryetarët e nderuar z.Çuci dhe z.Gjekmarkaj, por në bazë të nenit 7, pika 1 të Rregullores, Kryetari i Kuvendit, ka për detyrë të kujdeset për mbarëvajtjen e seancave plenare dhe veprimtaria të jetë e plotë, e sigurisht të sigurojë kushte që të gjithë deputetët të jenë pjesëmarrës në seancë”.
“Sigurisht unë nxora urdhrin për këtë seancë plenare me vështirësi t’iu them të drejtën, sepse ka vetëm 1 pikë, 1 çështje në rend të ditës sot, një projektligj, komisionet as ishin mbledhur dhe nuk kishin kuorumin e nevojshëm për të diskutuar projektligje të tjera; mund të mos ishte zhvilluar as kjo seancë sot, kështu që ju bëj thirrje të gjithë deputetëve të marrin pjesë në komisione dhe të jenë pjesëmarrës”, tha Spiopali.
Spiropali shtoi se “sa i takon pjesëmarrjes së Shqipërisë në Odesa, në Ukrainë, në Samitin e organizuar nga Presidenti Zelensky me pjesëmarrjen e krerëve të tjerë të shteteve të Europës Juglindore, mos kini asnjë merak se Shqipëria u përfaqësua në nivelin më të lartë dhe më të mirë të mundshëm Bardhi, dhe këtë e them pa modesti fare”.
Discussion about this post