Pak ditë më parë LSI reagoi në lidhje me skandalin në shkollën 9-vjeçare “22 Tetori” në Berat, ku një mësues i dënuar më parë për pedofili është rikthyer në shkollë duke dhënë sërish mësim. Ishte deputetja Erisa Xhixho që ngriti zërin për këtë problem, nënvizoi nevojën e një regjistri publik për pedofilët. Por me sa duket, në Kuvendin e sotëm kjo kërkesë e saj nuk është marrë parasysh dhe Xhixho ka reaguar përmes një deklarate jashtë sallës së Parlamentit. Sipas deputetes, ky është një rast i rëndë që vë në rrezik sigurinë e fëmijëve në shkolla dhe qeveria nuk duhet ta kalojë kaq lehtë. Sakaq, ajo theksoi edhe njëherë se situata në vend e bënë ehe më domosdoshëm aplikimin e regjistrit kombëtar të të dënuarve për krime seksuale.
“Rasti skandaloz i mësuesit pedofil i cili edhe pse ishte i dënuar në 2003 me vendim të formës së prerë për dy vepra ‘pedofili’ dhe ngacmim seksual arriti të jetë pjesë dhe të emërohet si mësues në shkollën “22 Tetori” në Berat duke u bërë pjesë e sistemit arsimor. Ky është një rast skandaloz i cili nuk mund të tolerohet ndaj kam thirrur në seancë urgjente pyetje përgjigje ministren e arsimit, pyetje përgjigje për të dhënë sqarimet për këtë situatë në të cilën ndodhet sistemi arsimor sot. Kjo ngjarje shumë e rëndë që ka tronditur opionin publik padyshim që e bën më të domosdoshëm nismën time për miratimin sa më parë të projektligjit për regjistrin kombëtar të të dënuarve për krime seksuale”, u shpreh ajo.
Sipas Xhixhos, qeveria nuk duhet të vonojë më pasi edhe në çastet që flasim jemi vonuar shumë për të marrë masa të tilla parandaluese.
“Është shumë i vonuar, ka që në 2013 që ka qenë projekt draft, ka qenë në zyrat e Parlamentit dhe është vonë për t’u miratuar. Por më mirë vonë sesa kurrë. Kështu që padyshim, miratimi sa më parë i këtij regjistri i cili mund të parandalonte raste si ky i fundit do mund të jetë një bazë ligjore dhe një pengesë për këta monstra për tu bërë pjesë e sistemit arsimor të cilët kërcënojnë fëmijët tanë. Si nënë, si qytetare si deputete do ta ndjek deri në fund këtë kauzë si unë ashtu dhe LSI pasi nuk mund të tolerojmë më që fëmijët tanë të jenë të rrezikuar nga këta monstra të cilët sot lëvizin të lirë në Shqipëri”, tha ajo, duke theksuar dhe njëherë se shoqëria nuk mund ta kalojë këtë fenomen si lehtë të pranueshëm.
Discussion about this post