Ka nisur seanca e sotme plenare në mungesë të deputetëve të Partisë Demokratike, të cilët bojkotuan punimet parlamentare. Opozita u përfaqësua vetëm nga deputetët e Partisë Mundësia, Erald Kapri dhe Redi Muçi.
Në seancën e sotme janë parashikuar për shqyrtim një sërë projektrezolutash për vlerësimin e veprimtarisë së institucioneve të pavarura gjatë vitit 2025, si dhe diskutime për çështje të ngritura nga zgjedhësit.
Ndër pikat kryesore të rendit të ditës janë projektrezolutat për vlerësimin e punës së Komisionit Qendror të Zgjedhjeve (KQZ), Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI), si dhe Bankës së Shqipërisë për vitin 2025.
Deputetët do të shqyrtojnë gjithashtu raportet vjetore të Autoritetit të Mbikëqyrjes Financiare (AMF), Institutit të Statistikave (INSTAT), Autoritetit të Komunikimeve Elektronike dhe Postare (AKEP), Radiotelevizionit Shqiptar (RTSH), Autoritetit të Mediave Audiovizive (AMA), Entit Rregullator të Energjisë (ERE) dhe Entit Rregullator të Ujit.
Ndërkohë, përreth godinës së Kuvendit janë vendosur masa të shtuara sigurie. Forca të shumta policie dhe mjete të blinduara janë dislokuar në zonë, megjithëse organizatorët nuk kanë paralajmëruar zhvillimin e ndonjë proteste gjatë ditës së sotme.
Në hapje të seancës, kryetari i Kuvendit, Niko Peleshi, bëri të ditur se kërkesa e Partisë Mundësia për zhvillimin e një interpelance lidhur me çështjet e Zvërnecit dhe Rrjollit nuk ishte pranuar.
“Është kërkuar interpelancë edhe për Zvërnecin dhe për Rrjollin. Janë çështje që janë diskutuar shpesh herë dhe ndaj nuk mund të ketë kërkesë të re, që mbështetet në të njëjtin objekt. Kërkesa për interpelancën nuk është pranuar”, deklaroi Peleshi.
Pas këtij njoftimi, deputeti i Partisë Mundësia, Erald Kapri, akuzoi mazhorancën se po cenon funksionimin e Kuvendit dhe po pengon ushtrimin e të drejtave parlamentare të opozitës.
Sipas Kaprit, kërkesat për interpelanca dhe seanca pyetje-përgjigje janë rrëzuar në mënyrë të padrejtë, ndërsa ai kërkoi llogari edhe për situatën në Policinë e Shtetit dhe praninë e shtuar të forcave të rendit pranë Kuvendit.
“E keni kthyer këtë parlament në një derexhe. Vetëm sot u informuam, me letrën tuaj kryetar, që kërkesat tona për interpelancë, të gjitha janë anuluar nga ana juaj. Si mund ta shkelni kaq dhunshëm Kushtetutën? Nuk është parlament ky. Nëse ju i thoni parlament këtij, nuk e di çfarë mund të them më tepër. Ajo që donim të ngrinim në këtë interpelancë me ministrin e Brendshëm, i cili me sa duket e kalon kohën duke sulmuar individë të nderuar që flasin për pritësen dhe mbrojnë qytetarët dhe nuk merret me Policinë e Shtetit, që ka dalë nga shinat e ligjit. Një Polici e Shtetit, që teksa po vija në Parlament, kishte rrethuar të gjithë Parlamentin me blinda dhe me policë. Pse? Sepse u trembët nga vezët ju. Si mundet që ministri i Brendshëm të mos pyetet për këtë gjë”, deklaroi Kapri.
Seanca plenare vijon me shqyrtimin e pikave të rendit të ditës, ndërsa deputetët e Partisë Demokratike mungojnë në sallën e Kuvendit.
Discussion about this post