Pasi Kuvendi i Shqipërisë fshiu nga faqja mbledhjen e Komisionit te Shëndetësisë, të drejtuar nga opozita, dhe RTSH ndërpreu transmetimin, ka reaguar opozita.
Kryetarja e Komisionit të Shëndetësisë, Albana Vokshi tha se diskutimet ditën e sotme nuk janë zhvilluar pasi në shkelje të Kushtetutës qeveria ka vendosur që Komisionet të zhvillohen online.
“Janë shkelur rregullat e Kushtetueses për të zhvilluar Komisionet online. Kërkoj të merren masa urgjente që sot kanë tentuar të “minojnë” parlamentarizmin dhe t’i mbyllet goja opozitës. Është e paprecedentë që t’i mbyllin gojën opozitës. RTSH Kuvend kanë ndërprerë sinjalin për Komisionin e Shëndetësisë, sikur të jenë një televizion privat, por ata paguhen nga taksat shqiptare. Na fshinë nga të gjitha faqet e Kuvendi, nga portali, sikur ne nuk zhvillojmë seancë diskutimi. Rama ka frikë, janë mësuar me kukulla dhe fasadë. Kryeministri mashtron gjoja i shtrin dorën opozitës”.
Vokshi tha se Rama po përpiqet që t’i mbyllë gojën opozitës duke vepruar me dy standarde, ndërsa bëri publike për mediet disa foto ku shihej kryeministri Rama dhe sekretari i përgjithshëm i PS, Damian Gjiknuri duke zhvilluar mbledhje pa maska dhe distancim social.
“Mazhoranca vepron me dy standarde, lejon aktivitete masive të qeverisë kurse opozitën e bllokon. Shikoni Ramën pa maskë me qindra njerëz brenda një salle. Gjiknuri po ashtu pa maska dhe distancim social. Mbledhje e qeverisë pa maska, ku ndryshon nga ajo me Komisioni, pse Rama mbledh qeverinë dhe ne anëtarë të Komisioni mos mblidhemi fizikisht? Një standard për mazhorancën që lejohet të zhvillojë aktivitete, kurse opozitës nuk i lejohet të zhvillojë aktivitete. Ne do jemi aty, do kërkojmë mbledhjet me prani fizike të deputetëve, administrata është e detyruar që të pranojë. PD do vijoj betejën e saj për të vijuar debatin në Komisione”, tha Vokshi.
Të dy kampet politike në vend kanë perceptime të ndryshme për mënyrën e zhvillimit të Komisioneve, ku qeveria është shprehur se komisionet do mbahen online, ndërsa opozita e ka kundërshtuar këtë vendim.
