Partia Demokratike e drejtuar nga Lulzim Basha po mban Kuvendin e saj Kombëtar ku pritet të miratohen ndryshimet statutore, por edhe të zgjidhen anëtarët e Këshillit të ri Kombëtar.
Të pranishëm në punimet e Kuvendit janë 10 deputetë, përfshi edhe Lulzim Bashën, ndërkohë që bie në sy mungesa e Enkelejd Alibeajt, një prej mbështetësve më të zjarrtë të kreut të PD-së zyrtare.
Surprizë mund të konsiderohet bashkimi i deputetes Ori Nebiaj me PD-në e Bashës, edhe pse ligjvënësja pak kohë më parë, dha dorëheqjen si anëtare e Kryesisë, duke iu bashkuar një grupi deputetësh që u distancuan nga përplasjet apo zhvillimet më të fundit në këtë parti, ku beteja politike është mes Bashës në njërën anë dhe Gazment Bardhit në anën tjetër.
Të pranishëm në Kuvend janë deputetët: Flutura Açka, Oriola Pampuri, Kreshnik Çollaku, Andia Ulliri, Merita Bakiu, Ori Nebiaj, Eralda Bano, Arbio Agalliu, Lulzim Basha dhe Selaudin Jakupllari.
Lidhur me mungesën e prezencës në mbledhjen e Kuvendit Kombëtar, vetë Alibeaj është justifikuar me impenjime partiake jashtë Shqipërisë.
Por, ka dyshime se Alibeaj ka bojkotuar mbledhjen pasi në propozimet e bëra për ndryshimet statutore, ai ka kërkuar të sanksionohet se Kryetari i partisë duhet të dorëhiqet në rast të humbjes në zgjedhjet parlamentare.
Ky propozim i Alibeajt është rrëzuar jo vetëm nga Kryesia, por edhe nga Komisioni përkatës që ka propozuar ndryshimet statutore.
Nuk dihet nëse arsyeja e mospjesëmarrjes në Kuvend ka lidhje pikërisht me këtë dispozitë, pasi në ndryshimet e propozuara të statutit, nuk parashikohet asnjë moment kur kryetari mund të dorëhiqet, apo vërtet angazhimet e Alibeajt me detyra partie jashtë vendit, ishin aq të rëndësishme, sa ai të mos ishte prezent në atë që Lulzim Basha e konsideroi si Kuvendin e së ardhmes.
Discussion about this post