Kuvendi Kombëtar i PD-së që po mbahet në stadiumin “Air Albania”, ka shpallur Azem Hajdarin, Heroin e Demokracisë, kryetar nderi të Partisë Demokratike.
Belind Këlliçi, i cili po drejton punimet e Kuvendit, në përfundim të miratimit të Statutit të ri, hodhi në votim vendimin e dytë të datës 11 dhjetor 2021 të lidhur me figurën e heroit Azem Hajdari.
“Në mbështetje të nenit 42 dhe 43, pika 1, germa D të Statutit të Partisë Demokratike të Shqipërisë, miratuar në datën 11 Dhjetor 2021, me propozimin e një grupi prej 7 deputetësh të PD-së, Kuvendi Kombëtar vendosi: “Shpalljen e zotit Azem Hajdari , Kryetar Nderi i Partisë Demokratike të Shqipërisë . Ky vendim hyn në fuqi menjëherë. Miratohet. Nga ky çast, pishtari i demokracisë, prijësi i Lëvizjes Studentore ‘90, i ndjeri Azem Hajdari , Kryetar Nderi i Partisë Demokratike”, tha demokrati.
Beteja e “Kuvendeve”, erdhi pas vendimit të SHBA-ve për shpalljen non-grata të ish-kryeministrit, masë që pasoi me përjashtimin e tij nga grupi parlamentar i PD-së më 9 shtator. Fill pas kësaj date nisi edhe përplasja me liderin e PD-së, Lulzim Basha, ndërsa mes dy figurave të rëndësishme brenda demokratëve nuk kanë munguar akuzat.
Discussion about this post