Kuvendi me dy seanca plenare, çfarë pritet të ndodhë sot në Parlament

Kuvendi i Shqipërisë do të zhvillojë sot dy seanca plenare. Seanca e parë nis në orën 10:00 dhe do të ketë në fokus zgjedhjen e zëvendëskryetarëve të Kuvendit, sekretariateve dhe përbërjes së Byrosë së Kuvendit.

Ndërsa seanca e dytë, e parashikuar për në orën 17:00, do të diskutojë dhe miratojë përbërjen e kryesive të komisioneve të përhershme parlamentare.

Një ditë më parë, kryetari i Kuvendit, Niko Peleshi, zhvilloi një takim konsultues me krerët e grupeve parlamentare për ndarjen e komisioneve. Sipas marrëveshjes së paraqitur, maxhoranca do të drejtojë 7 komisione, ndërsa opozitës i janë lënë 4.

Partia Demokratike ka kundërshtuar fort këtë ndarje, duke akuzuar maxhorancën se i ka hequr opozitës drejtimin e Komisionit të Integrimit Europian, që historikisht i është besuar opozitës.

Kryetari i grupit parlamentar të PD-së, Gazment Bardhi, i ka përcjellë ankesat edhe pranë ambasadave të huaja në Tiranë, duke kërkuar ndërhyrjen e tyre për të mos lejuar miratimin e njëanshëm të strukturës së re.

Njoftimet:

URDHËR

Nr. 1, datë 15.9.2025

PËR MBLEDHJEN E KUVENDIT NË SEANCË PLENARE, DATË 16.9.2025, ORA 10:00

Në mbështetje të nenit 7, pika 6, dhe nenit 27/1 të Rregullores së Kuvendit,

URDHËROJ:

Mbledhjen e Kuvendit në seancë plenare në datën 16.9.2025, ora 10:00.
Rendi i ditës i seancës plenare është si më poshtë:
Miratimi i procesverbalit të seancave plenare të datës 12.9.2025.
Njoftime.
Projektvendimi “Për zgjedhjen e zëvendëskryetarëve të Kuvendit”.
Projektvendimi “Për zgjedhjen e sekretariateve të Byros të Kuvendit”.
Projektvendimi “Për përbërjen e Byrosë së Kuvendit”.
III. Ngarkohen shërbimet e Kuvendit për publikimin e rendit të ditës të seancës plenare, njoftimin e anëtarëve të Kuvendit me anë të mjeteve të komunikimit elektronik, si dhe përgatitjen e dokumentacionit parlamentar që do të shqyrtohet.

IV. Ky urdhër hyn në fuqi menjëherë.

URDHËR

Nr. 2, datë 15.9.2025

PËR MBLEDHJEN E KUVENDIT NË SEANCË PLENARE, DATË 16.9.2025, ORA 17:00

Në mbështetje të nenit 7, pika 6, nenit 21, nenit 22 dhe nenit 27/1 të Rregullores së Kuvendit,

URDHËROJ:

Mbledhjen e Kuvendit në seancë plenare në datën 16.9.2025, ora 17:00.
Rendi i ditës i seancës plenare është si më poshtë:
Projektvendimi “Për zgjedhjen e kryesive të komisioneve të përhershme të Kuvendit”.
III. Ngarkohen shërbimet e Kuvendit për publikimin e rendit të ditës të seancës plenare, njoftimin e anëtarëve të Kuvendit me anë të mjeteve të komunikimit elektronik, si dhe përgatitjen e dokumentacionit parlamentar që do të shqyrtohet.

IV.Ky urdhër hyn në fuqi menjëherë.