Pas debateve të shumta që u zhvilluan ditën e sotme në Kuvend, është miratuar sot me 73 vota pro, ligjin ‘për bashkëqeverisjen’. 42 deputetët votuan kundër, ndërsa ky ligj u bë shkak për jo pak debate në seancën e sotme parlamentare.
Deputetët kanë miratuar gjithashtu me 112 vota pro akti normativ “Për miratimin e disa ndryshimeve të nënshkruara në marrëveshjen për prodhimin dhe furnizimin nga dhe ndërmjet PFIZER EXPORT B.V. dhe ministrisë së Shëndetësisë dhe Mbrojtjes Sociale të Shqipërisë.
Ky akt normativ kaloi pas asnjë votë kundër dhe vetëm dy abstenime.
Në Kuvend është miratuar edhe projektligji “Për ratifikimin e konventës ndërmjet Këshillit të Ministrave të Republikës së Shqipërisë dhe Qeverisë së Shtetit të Izraelit për shmangien e taksimit të dyfishtë dhe parandalimin e evazionit fiskal në lidhje me tatimin mbi të ardhurat”.
Një tjetër projektligj i miratuar sot në Kuvend me 114 vota pro dhe asnjë kundër është, projektligji “Për ratifikimin e konventës së Këshillit të Evropës për bashkëprodhimin Kinematografik”.
Çfarë përfshin Ligji?
Ligji për Bashkëqeverisjen përbën një nismë për rikonceptimin dhe riorganizimin institucional të Agjencisë për Dialog dhe Bashkëqeverisje, duke u nisur nga qëllimi i përfshirjes së qytetarëve.
Kjo ka të bëjë gjithashtu me përfshirjen e teknologjisë në dhënien e shërbimeve.
Sipas ligjit, Agjencia, në bashkëpunim me institucionin e administratës shtetërore, heton kryesisht të gjitha faktet dhe vlerëson të gjitha rrethanat e nevojshme për kontrollin e veprimtarisë administrative, të administratës shtetërore.
“Kur është e nevojshme kryerja e hetimeve të thelluara për konstatimin e fakteve të nevojshme të çështjes, titullari i institucionit, me paraqitjen e kërkesës së drejtorit të Përgjithshëm të Agjencisë, miraton krijimin e një grupi pune, pjesë e të cilit do të jenë personat e ngarkuar nga drejtori i Përgjithshëm i Agjencisë sipas përcaktimit në kërkesë”, shkruhet në ligj
Ndërkohë, mes kompetencave, gëzon të drejtën e masave disiplinore për funksionarët e institucioneve që shkelin vendimet e saj me gjoba, deri edhe në largim nga puna.
Discussion about this post