Presidenti Ilir Meta i bën apel Kuvendit që të miratojë kërkesën e tij për të ngritur një Komision të Posaçëm për çështjen e parkut të Butrintit.
Në një konferencë për media, Meta tha se Kuvendi duhet që të mos votojë me sy mbyllur, por të reflektojë mbi ato problematika, që sipas kreut të shtetit, kanë shoqëruar marrëveshjen e menaxhimit të parkut të Butrintit. Por, nga ana tjetër Meta thotë se nuk ka ndonjë optimizëm që mazhoranca të reagojë.
Pyetja: Nëse nuk merren parasysh nga Parlamenti, keni në plan ndonjë akt politik pas 24 korrikut?
Meta: Qëndrimet e mia kanë qenë të qarta në mbrojtje të trashëgimisë kulturore dhe kombëtare, si çështja e teatrit dhe ajo që po diskutojmë. Relacioni është shumë solid dhe i mirëargumentuar. Dëshiroj që për një çështje kaq të rëndësishme, Kuvendi të mos votojë symbyllur, por t’i hapë sytë mirë. Nuk duhet të paragjykoj vendimet e tij.
Pyetja: Çfarë ju bën të mendoni se mazhoranca do të veprojë ndryshe?
Meta: Nuk kam shprehur ndonjë optimizëm mbresëlënës përsa i takon përgjegjshmërisë së mazhorancës. Apeloj që për një çëshjtje të rëndësisë kaq të madhe, të ketë një reflektim. Shprehja e interesit nga partneri strategjik për marrjen në administrim të Parkut Kombëtar të Butrintit, ka përfshirë të gjitha nënzonat dhe sipërfaqen e miratuar si Park Kombëtar i mbrojtur? Nëse jo, cili do të jetë destinacioni i përdorimit, apo niveli i mbrojtjes së zonave pasuri pronë publike e paluajtshme, të lëna jashtë administrimit sipas kësaj marrëveshjeje? Nisur nga rëndësia e kësaj çështje, konstatoj se mekanizmat kushtetues, mes ekzekutivit dhe legjislativit, nuk kanë funksionuar. Me këtë ligj, janë cenuar pasuritë kombëtare.
Discussion about this post