Autoritetet italiane janë në kërkim të një ariu që vrau një vrapues 26-vjeçar në rajonin verilindor të Trentino javën e kaluar. Varrimi i Andrea Papit u bë të mërkurën. Ndërsa ariu femër 17-vjeç që e vrau njihet si JJ4 dhe u identifikua përmes testimit gjenetik. I njëjti ari, JJ4 gjithashtu sulmoi një baba e bir në qershor 2020.
Qeveria provinciale kishte lëshuar një urdhër për vrasjen e ariut në atë kohë, por urdhri u rrëzua nga gjykatë. Këtë herë autoritetet kanë zgjedhur të eutanizojnë ariun.
“Ne po bëjmë gjithçka që mundemi për të gjetur ariun dhe për të garantuar sigurinë e banorëve vendas,”- tha Maurizio Fugatti, presidenti i rajonit të Trentino. Papi po vraponte në fshat kur u sulmua dhe u vra, duke shkaktuar frikë tek banorët. Shumë e kanë kërkuar kapjen e ariut dhe kanë kërkuar ndryshime në një plan evropian të quajtur “Life Ursus”, i cili synon të rifusë arinjtë e murrmë në Alpe.
“Fshati është i mërzitur, i zemëruar. Na ka vdekur një djalë, jemi në zi, por jemi edhe të inatosur sepse ka vdekur nga sulmi i ariut. Ngjarje që nuk duhej të ndodhte,”- u tha gazetarëve jashtë kishës Antonio Maini, kryebashkiak i Caldes.
Incidenti ka rindezur debatin për bashkëjetesën e njerëzve dhe kafshëve të egra në zonë dhe ka ngritur pikëpyetje se si të balancohet më mirë nevoja për të mbrojtur speciet e rrezikuara me sigurinë e banorëve. Arinjtë janë një specie e mbrojtur në Itali dhe popullsia e tyre është rritur në vitet e fundit për shkak të përpjekjeve për ruajtje. Lloji i arinjve të murrmë u rifut në rajon rreth dy dekada më parë. Që atëherë, popullsia e arinjve në Trentino është rritur nga 3 në afërsisht 100 arinj. Pavarësisht shpresave se arinjtë do të përhapeshin nëpër Alpe, ata kanë qëndruar kryesisht të përqendruar në Trentino.
JJ4, ariu përgjegjës për sulmin e fundit fatal ndaj vrapuesit, ka lindur në Trentino. Prindërit e saj u sollën nga Sllovenia./BBC
Discussion about this post