Gazetari nga Kosova, Berat Buzhala ka reaguar mbi komentin e kryeministrit Edi Rama për incidentet e regjistruara në koncertin e Goran Bregoiç në Korçë. Përmes një postimi në twitter, analisti kosovar thotë se nëse shqiptarët i sulen Bregoviçit sepse është serb, atëherë ku qëndron ndryshimi me serbët që kritikojnë Dua Lipën sepse është kosovare. Për Buzhalën nuk mund të ketë krahasim më skandaloz se kaq.
Më tej gazetari kosovar ka vazhduar me një postim në facebook ku komenton disa fjalë të tjera të marra nga reagimi i kryeministrit Rama. Ai shton se nëse Bregoviçi paska qenë kroat po aq sa serb e mysliman, atëherë përse nuk ka jetuar në Zagreb gjatë luftërave, por në Beograd. Ai gjithashtu ka përmendur një shembull tjetër ku thotë se edhe Kusturiza (Emir Kusturica, një aktor serb), është mysliman, por s’i ka shërbyer askujt.
“Edi Rama nuk e ka as idenë ma te vogël se çka po fole. Ky mendon qe kosovaret dhe serbet janë te njëjtë. Ky mendon qe edhe serbet edhe shqiptaret janë te barabarte, ne krime dhe ne vuajtje. Paramendojeni, e barazon Dua Lipën me Goran Bregovicin. Me Goranin që ka këndu kundër bombardimeve te NATO-se, me Goranin që e ka pas shok personal Radovan Karaxhiçin. Ani kur po thojnë, babën kroat, nanën serbe, bashkëshorten myslimane. O vorr, Kusturica është mysliman me babë e me nanë, ama kujna i ka shërby. Nese Bregovici koka kroat po aq sa serb e mysliman, atëherë pse nuk jetoi gjatë luftërave ne Zagreb a Sarajeve, por ne Beograd?”- shkruhet në statusin e fb të Berat Buzhalës.
Pak më parë, kryeministri Edi Rama i quajti mesjetarë dhe fashistë shqiptarët që sulmuan një natë më parë Bregoviçin. Kreu i Qeverisë shtonte se një serb që i hakërrehet Dua Lipës në rrjetet sociale vetëm sepse ajo është një kosovare krenare, nuk ndryshon askund me shqiptarët që iu sulën mbrëmë Bregoviç-it, duke barazuar yllin ndërkombëtar me origjinë shqiptare me Bregoviç.
