Laçi e fillon me fitore sezonin 2022/2023 në Superiore, teksa feston edhe Bylisi, që triumfoi 2-0 ndaj Kastriotit. Bardhezinjtë mposhtën 3-1 Teutën, ekip të cilin e dominuan plotësisht.
Viktor Velkoski zhbllokoi takimin në minutën e 12’. Mbrojtësi nga Maqedonia e Veriut realizoi me kokë dhe kaloi kurbinasit në avantazh. Mentor Mazrekaj kishte një shans të artë për të shënuar në pjesën e parë.
Penallti për vendasit, teksa gjuajtja e kapitenit u prit nga portiere Pano Qirko. Laçi e filloi mirë edhe pjesën e dytë, duke shënuar dy gola të tjerë brenda pesë minutave.
Në fillim dyfishoi rezultatin afrikani Adeleke Akinyemi (52’), teksa Mentor Mazrekaj dhuroi “show” pesë minuta më vonë, duke dërguar rezultatin në 3-0.
Teuta reagoi dhe shkurtoi rezultatin falë golit të mbrojtësit Artan Jazxhi (66’), që u konfirmua nga VAR-i. Vetëm kaq, vendasit menaxhuan minutat e mbetura dhe siguruan suksesin e parë në kampionat.
Rikthim me fitore në krye të Laçit për trajnerin malazez Dejan Vukicevic.
Ndërkohë, dueli Bylis-Kastrioti përfundoi 2-0. Nigeriani Anthony Beji realizoi golin e parë (66′). Vendasit shënuan edhe golin e qetësisë dy minuta më vonë me anë të Luis Kaçorrit.
Vlen të theksohet se Kastrioti pati vetëm 4 lojtarë në stol, pasi nuk ka mundur të federojë asnjë prej blerjeve të reja. Merkatoja e krutanëve është e bllokuar, për shkak të detyrimeve të pashlyera ndaj ish mbrojtësit Edi Bojom.
Discussion about this post