Laçi është kualifikuar në finale të Kupës së Shqipërisë, për herë të pestë në historinë e vet. Barazimi 1-1 kundër Teutës sot ka mjaftuar, pasi kurbinasit në Durrës ia kishin dalë me rezultatin 2-1.
Bardhezinjtë e nisën mirë ndeshjen dhe iu afruan golit në disa raste, por një gabim i Velkoski më pas solli golin për skuadrën e Teutës me anë të Rubin Hebajt.
Skuadra e Duros nuk mund të pajtohej me rezultatin dhe sulmet e tyre u konkretizuan në fundin e pjesës së parë, me anë të Akinyemi. Sulmuesi nuk fali në minutën e 44-t, duke shënuar me një goditje brenda zonës.
Laçi mund të kishte shënuar edhe të dytin më pas, por Qirko ndaloi nigerianin dhe sulmuesin nga Mali, Guindo. Durrsakët ushtruan presion deri në fund për të shënuar golin që do e çonte ndeshjen në shtesë, por nuk ia dolën dot dhe u eliminuan nga Kupa e Shqipërisë.
Discussion about this post