Laçi përmbys Partizanin në “Arenën e Demave”

Laçi mori 3 pikë të rëndësishme në transfertë, duke mundur Partizanin, në takimin e vlefshëm për Superioren.

Madje laçianët kanë fituar me përmbysje në “Arenën e Demave”, pasi Partizani kaloi në avantazh që në minutën e 12-të.

Mensah ia doli të mposhtë portierin Dajsinani, pas një koordinimi perfekt me kokë. Kurbinasit u përpoqën të reagojnë, goditja e Melos u ndal nga “gardiani’ Qirko.

Të kuqtë “flirtuan” me golin në minutën e 41-të me Murataj, por pa mundur dot të dyfishojnë shifrat. Me rezultatin 1-0 u mbyllën 45 minutat e para.

Por në pjesën e dytë, madje në minutat e fundit, të besuarit e Mirel Josës barazuan shifrat me Sobowale. Përmbysja erdhi në fund me Tresan.

Me këtë rezultat, Partizani renditet në vendin e dytë me 35 pikë. Ndeshja e radhës për të besuarit e Orges Shehit është ndaj Vllaznisë në Shkodër.

Në krahun tjetër, Laçi renditet në vendin e pestë (25 pikë) dhe do të përballet me Teutën në shtëpi.