Laert Haxhiu është ekstraduar këtë të mërkurë në Shqipëri. Me forca të shumta policore, Haxhiu pritet u transportua përmes pikës së kalimit kufitar Kakavijë drejt vendit tonë.
Laert Haxhiu, i njohur si kundërshtar i Aldo Bares, u arrestua në muajin maj të vitit 2023 në Greqi dhe mbahej në burgun e Koridhalos.
Ai është dënuar me burgim të përjetshëm nga Gjykata e Posaçme në muajin prill të këtij viti, për atë që është cilësuar si “Masakra e Lushnjes”, ngjarje e shënuar në vitin 2017, ku dy persona mbetën të vrarë dhe dy të tjerë të plagosur.
Konkretisht, viktima mbetën Zamir Latifi dhe Jurgen Hoxha dhe të plagosur Marjus Xhepexhiu dhe Bujar Turku.
Për të njëjtën ngjarje janë dënuar me burg përjetë Anterio Kaloshi dhe Orgest Bilbili.
Po ashtu, ndaj tij rezulton edhe një tjetër dënim me 18 vite burgim nga Gjykata e Lushnjes për një plagosje të dyfishtë.
“32-vjeçari është sjellë në Kakavije, në masa të larta sigurie, nga Policia greke dhe është marrë në dorëzim në Kakavije, nga Forcat Speciale ‘RENEA’. Ky shtetas ishte shpallur në kërkim ndërkombëtar nga Interpol Tirana, pasi: Gjykata e Lushnjës, në vitin 2017, e ka dënuar me 18 vjet burgim, për veprat penale “Vrasja në rrethana të tjera cilësuese”, mbetur ne tentativë dhe “Mbajtja pa leje dhe prodhimi i armëve, armëve shpërthyese dhe i municionit”. Shtetasi Laert Haxhiu, më datë 25.09.2016, ka plagosur me armë zjarri shtetasit Xh. Sh. dhe S. Xh.. Gjykata e Posaçme kundër Korrupsionit dhe Krimit të Organizuar, e ka denuar me burgim të perjetshëm, per veprat penale “Grupi i strukturuar kriminal”, “Kryerja e veprave penale nga organizata kriminale ose grupi i strukturuar kriminal”, “Vrasja në rrethana të tjera cilësuese”, “Mbajtja pa leje dhe prodhimi i armëve, armëve shpërthyese dhe i municionit” dhe “Prishja e qetësisë publike””, njoftoi policia.
Akuza penale ndaj Lart Haxhiut janë ngritur edhe për një tjetër procedim penal, pas dëshmisë së Artan Tafanit. Ky i fundit hodhi dritë mbi disa vrasje dhe ngjarje të tjera kriminale të bandës, që sipas hetuesve, drejtohej nga Laert Haxhiu. Dosja është ende në gjykim.
Discussion about this post