Prej më shumë se një dekade, banorët e një lagjeje në qendër të Sukthit jetojnë përballë një rreziku të përditshëm për shëndetin e tyre: një kanal ujërash të zeza i hapur, rreth 200 metra i gjatë, që kalon mes pallateve dhe banesave të tyre.
Ky kanal, që sipas banorëve nuk është ndërhyrë prej 10-15 vitesh, është kthyer në një vatër infeksionesh, me aromë të rëndë dhe praninë e mbetjeve të hedhura pa kriter. Përveç rrezikut për të rriturit, më të ekspozuarit janë fëmijët, të cilët kalojnë pjesën më të madhe të ditës duke luajtur në lagje. Zona ka rreth 10 mijë banorë dhe 400 nxënës shkolle.
“Kanal i hapur, plot me plehra, era është e padurueshme. Fëmijët luajnë këtu, është rrezik i përditshëm,” – thotë një banore.
“Ka mbi 10 vjet që është kështu, i kemi bërë kërkesë bashkisë, por vetëm premtime kemi dëgjuar,” – shprehet një tjetër banor i shqetësuar.
Përveç kanalit, një tjetër problem shqetësues është menaxhimi i mbeturinave, që sipas banorëve nuk pastrohen rregullisht, duke e përkeqësuar edhe më tej situatën.
Banorët i bëjnë thirrje Bashkisë Durrës dhe institucioneve përgjegjëse për ndërhyrje të menjëhershme, duke theksuar se kjo situatë nuk mund të zvarritet më tej, pasi po rrezikon seriozisht shëndetin dhe mirëqenien e komunitetit/ Euronews Albania
Discussion about this post