Një muaj pas arrestimit Bashkim Murataj është lënë në burg ditën e sotme nga Apeli i Gjykatës së Posaçme pasi akuzohet si pjesë e një grupi kriminal të trafikut të drogës.
Murataj kishte apeluar vendimin e Shkallës së Parë, dhe pavarësisht kërkesës së mbrojtes, Apeli e ka gjykuar të drejtë masën shtrënguese ndaj tij duke e lënë në burg.
Si u kap sasia e drogës?
Sasia e konsiderueshme e drogës u kap në shkurt të vitit të kaluar në Kapshticë pas një kontrolli të imtësishëm. Ajo u kap në dy kamionë të ndryshëm dhe ishte ndarë në 103 thasë. Në dy kamionët ndodhej një ngarkesë me krunde dhe mes tyre ishin fshehur thasët me kanabis. Autoritet kishin informacion për sasinë e konsiderueshme të drogës, e cila ishte planifikuar të trafikohej nga Shqipëria drejt Greqisë. Kamionët u mbajtën në vëzhgim prej disa ditësh nga agjentët e antidrogës, ku në Kapshticë bënë të mundur kapjen e sasisë së konsiderueshme të drogës.
