Është arrestuar me urdhër të SPAK ish-ministri i LSI-së Lefter Koka. Sipas burimeve, forcat operacionale kanë mbërritur paraditen e sotme në Durrës, dhe kanë shoqëruar disa persona, mes tyre dhe Kokën, të cilit pritet që t’i komunikohet dhe masa e arrestit.
Koka ka qenë ministër i LSI, dhe gjithashtu deputet i kësaj force politike, deri më zgjedhjet e 25 prillit, ku ai njoftoi se do të garonte në listat e PS për deputet.
Lajmi i arrestimit të Kokës duket se nuk ishte aq i papritur, thënë kjo pasi ish-ministri i LSI, arriti të siguronte mandatin e deputetit në qarkun e Durrësit, por hoqi dorë vetëm pak ditë më vonë.
Gjithashtu, Koka aludohej se ishte pjesë e listës që pritet të shpallen non-grata nga SHBA, pas emrit të Sali Berishës. Përveç Kokës burimet saktësojnë se ka dhe disa persona të tjerë të shoqëruar, të cilëve në vijim pritet që t’iu komunikohet edhe akuza.
Kush është Lefter Koka?
Lefter Koka u zgjodh ministër i Mjedisit në kabinetin e kryeministrit Edi Rama pas zgjedhjeve parlamentare të vitit 2013, si pjesë e Lëvizjes Socialiste për Integrim. Ai u largua nga funksioni pas një mandati të plotë në vitin 2017, si pasojë e prishjes së koalicionit PS-LSI.
Lefter Koka ka përfunduar studimet në Fakultetit e Shkencave Juridike në Strugë. Ai u përfshi në politikë në vitin 2000 si anëtar i Këshillit Bashkiak të Durrësit, pas angazhimit në sektorin privat. Në vitet 2003-2007, Lefter Koka ka shërbyer si kryetar i Bashkisë së Durrësit, ndërsa prej vitit 2009 ishte deputet i Kuvendit të Shqipërisë nën siglën e Lëvizjes Socialiste për Integrim.
Më 1 shtator, deputeti i zgjedhur i PS-së, Lefter Koka, ka dhënë dorëheqjen nga mandati i deputetit të fituar në zgjedhjet e 25 prillit në Durrës.
Discussion about this post