Disa urdhër-arreste janë lëshuar nga Prokuroria e Posaçme ndaj zyrtarëve të Policisë lidhur, me një hetim kundër trafikimit të qënieve njerëzore.
Në qendër të hetimeve, sipas burimeve pranë Prokurorisë së Posaçme, ka qenë një rrjet që organizonte kalimin e paligjshëm të refugjatëve drejt vendeve të BE-së.
Hetimet kanë zbuluar se trafikantët kishin lidhje me zyrtarë të lartë të policisë gjatë ushtrimit të aktivitetit kriminal.
Mësohet se deri më tani janë ekzekutuar disa urdhër-arreste, ndërsa aksioni është në vijim. Në total, janë mbi 20 urdhër-arreste të lëshuara nga SPAK dhe të miratuara nga Gjykata e Posaçme.
Informacionet janë paraprake dhe një njoftim zyrtar pritet nga autoritetet lidhur me rastin.
Shqetësim për bashkëpunimin e zyrtarëve të policisë me krimin e organizuar e ngriti disa ditë më parë edhe kreu i SPAK Altin Dumani, gjatë raportimit në Këshillin e Lartë të Prokurorisë.
“Në raste të caktuara, sidomos ato të krimit të organizuar, nuk bashkëpunojmë dot me policinë sepse na rezulton se ka policë të përfshirë dhe është në nivele te larta. Hetimet tona kanë treguar që eksponentë të Policisë së Shtetit, madje me funksione të larta kanë bashkëpunuar me krimin e organizuar, referuar dhe çështjeve që kemi hetuar, dhe çështjeve që kemi në hetim e sipër. Janë një kategori çështjesh që ne hetojmë ekskluzivisht me BKH-në”, tha Dumani para KLP-së javën e kaluar.
Lidhur me aksionin, ministri i Brendshëm Taulant Balla tha se do ketë një komunikim zyrtar më vonë gjatë ditës nga Policia. “Drejtori i Përgjohem i Policisë së Shtetit diku pas mesditës do të ketë një komunikim të rëndësishëm lidhur me një operacion të madh ndërkombëtar të inicuar nga Policia e Shtetit në bashkëveprim dhe me punën e shkëlqyer të SPAK me rezultate që do i quaja spektakolare, por që duroni dhe pak orë deri ku Drejtori i Përgjithshëm të njoftojë këto rezultate të cilat shprehin qartë angazhimin e qeverisë shqiptare kundër këtij fenomeni që është luftë globale”, tha Balla në një reagim.
Discussion about this post