Uniformat blu kanë zhvilluar mbrëmjen e sotme një aksion, nëpërmjet së cilës kanë zbuluar një bazë falsifikimi të dokumentave dhe strehimit të emigrantëve nga vendet e treta me qëllim kontrabandimin e tyre në një nga vendet e BE-së, kundrejt fitimit.
Në kuadër të operacionit të koduar “Passport”, janë arrestuar në flagrancë dy persona. Policia njofton se bëhet fjalë konkretisht për të identifikuarit me iniciale G. H., 53 vjeç dhe Xh. H., 24 vjeç, (babë e bir), banues në Karbunarë, Lushnjë.
Teksa dër të tjera në njoftimin për shtyp jep detaje se personat në fjalë janë kapur në lagjen “Kongresi”, Lushnjë, ku kishin marrë një banesë me qera, që shërbente si bazë për të strehuar klandestinë me qëllim trafikimin e tyre për në vendet e Bashkimit Europian duke i pajisur me pasaporta të dyshuara të falsifikuara.
Gjatë kontrollit të banesës, u gjetën dy shtetas të huaj si edhe u sekuestruan në cilësinë e provës materiale 11 pasaporta, dokumenta të tjera të dyshuara të falsifikuara, 5600 euro, një sasi parash që përdoren në Bangladesh, 1 laptop, 6 aparate celularë dhe 1 automjet tip “Renault”.
Sakaq, vijon puna për dokumentimin e plotë të kësaj veprimtarie kriminale.
Ndërsa pritet që të arrestuarit të përballen me akuzën për këtë vepër penale.
