Apeli i Posaçëm ka lënë sërish në burg Selim Çekajn, babin e Arbër Çekajt, i cili para disa muajsh u kap me 49 kg kokainë në kontejnerin me banane.
Arrestimi i Selim Çekajt
Pas kapjes së Çekajt 3 vite më parë me 613 kg kokainë në firmën e vet, dyshohet se aktiviteti kriminal, është mbajtur gjallë nga babai i tij Selim Çekaj, i cili ra në prangat e policisë pas operacionit në kontejnerët e bananeve në 1 prill. Sipas uniformave blu, kontejneri ishte nisur nga Ekuadori me destinacion Shqipërinë, për llogari të firmës “Ecoalmax” në Maminas, me administrator Selim Çekajn. Ndërsa, rreth orës 02:00 të mëngjesit i është nënshtruar fillimisht skanimit dhe më pas është kontrolluar imtësisht, për shkak se autoritetet shqiptare, ngarkesat që vijnë nga Ekuadori i konsiderojnë me risk të lartë. Gjatë aksionit në disa kontejnerë bananesh, policia ka mundur të gjejë 49 kg në kontejnerin e administruar nga 72-vjeçari, ku sasia e drogës ishte ndarë në 31 pako të formave të ndryshme dhe ishte mbështjellë me letër natriban të lyera me graso. Ashtu si edhe i biri, Selim Çekaj, në rolin e porositësit, dyshohet të ketë ndjekur të njëjtën rrugë dhe skemë për të fshehur kokainën, pasi sasia e drogës është gjetur e fshehur në shtyllat anësore të kontejnerit, në një ndarje me hapje të veçantë. Ndër të tjera mësohet se teksa forcat policore kanë mbërritur në port, 72-vjeçari Çekaj nuk e ka pranuar akuzën duke u shprehur se ka porositur vetëm bananet në Ekuador dhe se nuk ka lidhje me drogën. Kjo i ka detyruar forcat e posaçme të kontrollojnë dhe të “mësyjnë” brenda kontejnerit ku është gjetur sasia e drogës.
