Presidenti Ilir Meta ka kërkuar ngritjen e një Komisoni Hetimor bazuar në raportin e INSTAT për 60 mijë fëmijët e larguar nga vendi gjatë 10 viteve të fundit. Meta shkruan në Facebook se është i shqetësuar për largimin masive të fëmijëve, pasi destinacioni i tyre final është i paqartë.
“Sipas të dhënave të bëra publike nga EUROSTAT, mbi 60.000 fëmijë janë larguar nga Shqipëria dhe kanë kërkuar azil për herë të parë në një vend të BE-së gjatë 10 viteve të fundit (2011-2020).Mbi 82 përqind e tyre janë nën moshën 14 vjeç.Thellësisht i shqetësuar për këtë largim masiv të fëmijëve nga Shqipëria, veçanërisht për faktin se destinacioni i tyre final është i paqartë, e mbështes kërkesën e CRCA/ECPAT dhe inkurajoj ngritjen e një Komisioni Hetimor Parlamentar, me hapjen e Kuvendit të ri, për të hetuar gjendjen dhe vendodhjen e tyre, analizuar arsyet dhe përgjegjësit, si dhe rekomanduar masat efikase me qëllim ndërtimin e një strategjie konkrete shtetërore për ndalimin e këtij fenomeni të rrezikshëm”.
Ndër të tjera, Presidenti shprehet se duhet të sigurohen kushtet që fëmijët ta ndërtojnë të ardhmen e tyre në atdhe.
“Të bëjmë gjithçka për fëmijët dhe të rinjtë shqiptarë, për të mbrojtur jetën dhe shëndetin e tyre, duke rikthyer besimin dhe garantuar mundësi dhe hapësira të reja, për t’u ndjerë plotësisht të realizuar, për të ndërtuar të ardhmen e tyre të sigurt europiane në Atdhe”, shkruan Meta.
