Ronaldo Tanushi, 12-vjeçari që humbi pa gjurmë tre ditë më parë në Tiranë, është gjetur sot në Sarandë. Lajmin e ka dhënë vetë babai i djalit, Gazmend Tanushi.
Në një lidhje telefonike për emisionin “Me zemër të hapur” në News24, Tanushi tha se sapo e kishte marrë sërish të birin, teksa nuk i mbajti dot lotët.
“Motra sa më erdhi një informacion, e kanë gjetur djalin. Unë tani jam në Fier, rrugës për në Sarandë. Faleminderit shumë të gjithëve, faleminderit ju, faleminderit Policisë së Shtetit”, tha babai.
Humbja e 12-vjeçarit i cili jeton në Bathore është denoncuar ditën e djeshme. Babai i 12-vjecarit, Gazmend Tanushi dha alarmin dy ditë pasi i biri nuk shkelte më në shtëpi. Ai tregoi se kishte bërë kallëzim në polici, por që nuk i kishin dhënë asnjë lajm. Tashmë, pas tre ditësh, familja është bashkuar sërish.
