Një ditë pas ngjarjes policia ka identifikuar dhe shpallur në kërkim 21-vjeçarin në Kurbin i cili qëlloi me kallashnikov në ajër nga automjeti në ecje, gjatë një ceremonie dasme, duke rrezikuar jetën e qytetarëve, dhe më pas e postoi videon në rrjetet sociale. Bëhet fjalë për të riun me emrin Klajdi Tafaj, 21 vjeç, banues në fshatin Gjormë, Kurbin, i cili pas arrestimit pritet të përballet më akuzën për këtë vepër penale. Gjithashtu, policia ka proceduar penalisht dhe kushëririn e tij, për veprën penale “Moskallëzimi i krimit”. Kujtojmë se ngjarja ka ndodhur konkretisht në aksin rrugor Laç-Mamurras, ndërsa shërbimet e Policisë, gjatë kontrollit të ushtruar në banesën e Klajdi Tafajt, kanë gjetur dhe sekuestruar armën e zjarrit kallashnikov me krehër me fishekë, me të cilën dyshohet të jetë qëlluar.
Materialet hetimore u referuan në Prokurorinë e Rrethit Gjyqësor Kurbin, për veprime të mëtejshme, për veprat penale “Mbajtja pa leje e armëve të zjarrit dhe municionit luftarak”, “Prishja e rendit dhe qetësisë publike” dhe “Moskallëzimi i krimit”.
Drejtoria Vendore e Policisë Lezhë fton qytetarët që të denoncojnë çdo rast të paligjshmërisë në Komisariatin Dixhital apo në numrin pa pagesë 112, duke u siguruar reagim të shpejtë e të paanshëm, kundrejt atyre që shkelin ligjin dhe cenojnë jetën e qytetarëve.
