Një operacion blic është zhvilluar mëngjesin e sotëm në qytetin e Korçës. Policia njofton se janë zbardhur dy raste të vjedhjeve në farmacinë e Spitalit Rajonal Korçë, teksa në pranga ka rënë një infermier.
Bëhet fjalë konkretisht për të arrestuarin me iniciale N. C., 43 vjeç, banues në Korçë (me detyrë infermier pranë Urgjencës së Spitalit Korçë), i cili sipas detajeve nga policia, më datë 08.03.2021 dhe 30.08.2021 ka vjedhur në farmacinë e Spitalit Rajonal Korçë një sasi të konsiderueshme medikamentesh e pajisjesh mjekësore me vlerë mbi 1.000.000 lekë.
Po ashtu nga veprimet hetimore të kryera rezultoi se, infermieri kishte vjedhur në farmacinë e Spitalit, një sasi medikamentesh dhe pajisjesh mjekësore, të cilat shërbenin për trajtimin e pacientëve me COVID-19 dhe me sëmundje tumorale, ku në cilësinë e provës materiale iu gjet e sekuestrua sasia e medikamenteve.
