Vrasje me armë zjarri në Tropojë – E treta brenda javës

Një 43-vjeçar është vrarë me armë zjarri në Tropojë. Sipas bluve, Artur Dauti është qëlluar me armë zjarri brenda një lokali në fshatin Dojan.

Autori i dyshuar është identifikuar si Flordian Mulaj, por ende nuk është arrestuar.

Konflikti që solli vrasjes mes dy personave, sipas hetimeve paraprake, dyshohet se ka ndodhur për motive të dobëta.

“Rreth orës 13:40, në një lokal në fshatin Dojan, dyshohet se shtetasi F.M., rreth 35 vjeç, për motive të dobëta, ka qëlluar me armë zjarri shtetasin A. D., rreth 43 vjeç, i cili për pasojë ka ndërruar jetë”, njoftoi policia.

“Në drejtim të Tropojës janë nisur forcat operacionale të DVP Kukës, specialistët e Hetimit të Krimeve, dhe dy grupe të Forcës Kombëtare të Sigurisë Njësia Shkodër, për lokalizimin dhe kapjen e autorit. Ndërkohë, grupi hetimor nën drejtimin e Prokurorisë vijon punën për zbardhjen dhe dokumentimin e plotë ligjor të këtij rasti,  si dhe shoqërimin e personave të tjerë të përfshirë në këtë ngjarje”, shtuan të njëjtat burime.

Vrasja e kësaj të premteje në Tropojë shënon të tretën e ndodhur gjatë kësaj jave, pas dy vrasjeve në Tiranë, ku u vra me thikë një 14-vjeçar pranë shkollës “Fan Noli” dhe u ekzekutua në një atentat mafioz Klaudio Prendi.