Prokuroria e Tiranës ka nisur hetimet për veprat penale të “Shpërdorimit të detyrës” dhe “Zhdukjes dhe vjedhjes se dokumenteve”, sa i përket çështjes së humbjes apo dëmtimeve të tjera të regjistrave të kadastrës së Tiranës.
Hetimi vjen pasi, kreu i Kadastrës Shqiptare, Artan Lame bëri të ditur pak ditë më parë se gjatë një kontrolli kanë konstatuar dëmtime të shumta në regjistrat e pronave. Lame tha se mijëra faqe janë zhdukur dhe qindra janë dëmtuar.
“Prokuroria pranë Gjykatës së Shkallës së Parë Tiranë, duke marrë shkas nga deklaratat e bëra në mediat e shkruara dhe audiovizive nga ana e Drejtorit të Përgjithshëm të Agjensisë Shtetërore të Kadastrës, Z. Artan Lame, lidhur me humbjen apo dëmtime të tjera të faqeve të regjistrave të kadastrës, për zonat në zhvillim të Tiranës si Farka, Ndroqi, Shën Gjergji etj, ka filluar kryesisht, hetimet duke regjistruar procedimin penal nr. 4807 datë 21.06.2022, për veprat penale të “Shpërdorimit të detyrës” dhe “Zhdukjes dhe vjedhjes se dokumenteve”, parashikuar nga neni 248 dhe 192/a i Kodit Penal, pa autorë të dyshuar”, thuhet në njoftimin e organit të akuzës.
Discussion about this post